రిచా చద్దా 'షకీలా'లో కనిపించనున్న షకీలా

సౌత్ శృంగార తార షకీలా. ఈమె జీవిత చరిత్ర ఆధారంగా ఓ బయోపిక్ చిత్రం తెరకెక్కనుంది. ఈ చిత్రంలో ప్రధాన పాత్రను బాలీవుడ్ నటి రిచా చద్దా పోషిస్తోంది. అయితే, తన జీవిత చరిత్ర ఆధారంగా తెరకెక్కే ఈ చిత్రంలో షకీలా కూడా ఓ చిన్న పాత్రలో కనిపించనుందట. ప్రస్తుతం ఈ చిత్రం షూటింగ్ శరవేగంగా జరుపుకుంటోంది. 

ఈ చిత్రం గురించి దర్శకుడు ఇంద్రజిత్‌ లంకేశ్‌ మాట్లాడుతూ 'షకీలాగారి గురించి సినిమా చేయాలని ఎప్పటి నుంచో అనుకుంటున్నాను. ఆమె వ్యక్తిగత జీవితం, సినిమా జీవితం నన్ను విపరీతంగా ఆకట్టుకొన్నాయి. ఆమె ఎదుర్కొన్న కష్టాలను, దాటి వచ్చిన కష్ట సమయాలను, అవకాశాలు లేని రోజుల్లో ఆమె చేసిన ప్రయత్నాలను, ఆమె వ్యక్తిగతానికి సంబంధించిన పలు అంశాలను నేను తెరపై చూపించాలనుకున్నాను.

తనకు సంబంధించిన ప్రతి విషయాన్నీ ఆమె కూలంకుషంగా మాకు చెప్పారు. మా కథానాయిక రిచా కూడా ఆమెతో చాలా సమయాన్ని గడిపారు. షకీలాగారిలాగా మాట్లాడటం నేర్చుకున్నారు. ఆమె వ్యావహారిక శైలిని అలవరచుకున్నారు. ఇటీవల షకీలాగారు మా సెట్లోకి వచ్చినప్పుడు కూడా మా ఆర్ట్‌ డిపార్ట్‌మెంట్‌ను పిలిచి అమూల్యమైన సలహాలు ఇచ్చారు. ఆమె నివాసం ఎలా ఉండేదో సంపూర్ణంగా వివరించారు' అని అన్నారు.