తెలుగు చిత్రపరిశ్రమకు సీనియర్ నటుడు కాంతారావు. ఎన్నో వందల చిత్రాల్లో నటించారు. గొప్ప పేరు ప్రఖ్యాతలు తెచ్చుకున్నారు. ఇపుడు ఆయన కుమారుడు రాజా ఆర్థిక కష్టాల్లో కొట్టుమిట్టాడుతున్నారు. అద్దె ఇంట్లో ఉంటున్నారు. ఈ ఆర్థిక కష్టాల నుంచి గట్టెక్కేందుకు ఆయన తెలంగాణ ప్రభుత్వానికి ఓ విజ్ఞప్తి చేశారు. ప్రస్తుతం తమ కుటుంబం పీకల్లోతు ఆర్థిక కష్టాల్లో ఉందని, అద్దె ఇంట్లో జీవిస్తున్నామని తెలిపారు.
ఇటీవల హైదరాబాద్ నగరంలోని రవీంధ్ర భారతిలో జరిగిన కాంతారావు శతజయంతి వేడుకల్లో ఆయన పాల్గొన్నారు. ఇందులో మాట్లాడుతూ, నా తండ్రి శతజయంతి వేడుకల్లో పాల్గొనడం మాకు సంతోషంగా ఉంది. సినీ పరిశ్రమ అంటే నాన్నకు ఎంతో ఇష్టం. ఆస్తులు అమ్ముకుని మరీ ఆయన చిత్రాల్లో నిర్మించారు. దీంతో తాము ఆర్థికంగా చాలా నష్టపోయాం.
ఆయన కేన్సర్ బారినపడినపుడు చికిత్స నిమిత్తం ఎంతో డబ్బు ఖర్చు చేశాం. ప్రస్తుతం తాను ఉద్యోగం చేస్తూ కుటుంబాన్ని పోషించుకుంటున్నాను. నగర శివారుల్లో ఓ ఇల్లు అద్దెకు తీసుకుని జీవిస్తున్నాం. పరిశ్రమ నుంచి మాకెలాంటి సాయం అందలేదు. తెలంగాణ ప్రభుత్వాన్ని నేను కోరుకునేది ఒక్కటే.. దయచేసి మాకు ఓ ఇల్లు కేటాయించి సాయం చేసి ఆదుకోవాలని విజ్ఞప్తి చేస్తున్నాను అని పేర్కొన్నారు.