'కబాలి' సినిమా స్ఫూర్తి.. లైంగికదాడి నుంచి మహిళను రక్షించిన రజినీ అభిమాని!

తమిళ సూపర్ స్టార్ రజినీకాంత్ నటించిన చిత్రాన్ని చూసిన ఓ అభిమాని... తమ హీరో స్ఫూర్తితో ఆపదలో ఉన్న ఓ మహిళను రక్షించాడు.

తమిళ సూపర్ స్టార్ రజినీకాంత్ నటించిన చిత్రాన్ని చూసిన ఓ అభిమాని... తమ హీరో స్ఫూర్తితో ఆపదలో ఉన్న ఓ మహిళను రక్షించాడు. ముగ్గురు యువకులు అత్యాచారం చేసేందుకు ప్రయత్నిస్తుండగా.. ఈ చిత్రం స్ఫూర్తితో వారితో పోరాడి ఆమెను కాపాడాడు. ఈ సంఘటన చెన్నై నగరంలోని ఆలందూర్ జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే.. 

రజినీకాంత్ తాజా చిత్రం 'కబాలి' గత శుక్రవారం విడుదలైన విషయం తెల్సిందే. ఈ చిత్రాన్ని ఆయన అభిమాని వసంతపాల్ తొలి రోజున తొలి షో చూసి ఇంటికి బయలుదేరాడు. అయితే, ఎయిర్‌పోర్టు మార్గంలో ట్రాఫిక్‌ అధికంగా ఉండటంతో మరో మార్గం ద్వారా ఇంటికి వెళ్తున్నాడు. 

ఈ క్రమంలో నిర్జన ప్రదేశానికి చేరుకున్నాక.. మహిళ అరుపులు వినిపించాయి. ఆ మహిళపై ముగ్గురు యువకులు అత్యాచారానికి పాల్పడటం గమనించాడు. వెంటనే పాల్‌ ఆ ముగ్గురిపై ఎదురుదాడికి దిగి పిడిగుద్దులు కురిపించాడు. వారితో ఘర్షణ పడుతున్న సమయంలోనే మహిళ అక్కడి నుంచి తప్పించుకుని పారిపోయింది. ఆ తర్వాత ఆ కామాంధులు కూడా పారిపోయారు. దీనిపై స్థానిక పోలీసులకు ఫిర్యాదు చేయగా, నిందితుల కోసం గాలిస్తున్నారు.