మెగా పవర్ స్టార్ రామ్ చరణ్ వరుస ప్రాజెక్టులకు కమిట్ అవుతున్నారు. ఇప్పటికే ఆర్ఆర్ఆర్ వంటి భారీ ప్రాజెక్టులో ఆయన నటిస్తున్నారు. అలాగే, తన తండ్రి చిరంజీవితో కలిసి ఆచార్య మూవీలో ఓ అతిథి పాత్రను పోషిస్తున్నారు. సెన్సేషనల్ డైరెక్టర్ ఎస్. శంకర్ దర్శకత్వంలో భారీ ప్రాజెక్టులో నటిస్తున్నారు. తాజాగా జెర్సీ మూవీ డైరెక్టర్ గౌతమ్ తిన్ననూరి దర్శకత్వంలో ఆయన ఓ చిత్రంలో నటించేందుకు సమ్మతించారు.
ఈ ప్రాజెక్టుపై విజయదశమి పండుగ పూట ఎట్ట‌కేల‌కు ఓ ప్రకటన వ‌చ్చింది. 'నేను ఎంతో ఆసక్తిగా ఎదురుచూస్తున్న కాంబినేషన్ వ‌చ్చింది' అని చెర్రీ ప్రకటన చేశారు. యూవీ క్రియేష‌న్స్ కూడా త‌మ ట్విట్టర్ ద్వారా ఈ ప్రాజెక్ట్‌కి సంబంధించిన ప్రకటన చేసింది.
'మ‌ళ్ళీరావా' వంటి సినిమాతో పెద్ద హిట్ త‌ర్వాత నానితో కలిసి గౌతమ్ తిన్ననూరి 'జెర్సీ' చేశాడు. ఈ చిత్రం విమ‌ర్శ‌కుల ప్ర‌శంస‌లు పొంద‌డ‌మేకాక ప‌లు అవార్డులు కూడా అందుకుంది. ఎమోష‌న‌ల్ కాన్సెప్ట్ మూవీల‌ను తెర‌కెక్కించ‌డంలో దిట్ట‌గా పేరున్న గౌతమ్ తిన్ననూరి ఇప్పుడు చ‌ర‌ణ్‌ను ఎలా ప్రెజంట్ చేస్తాడ‌నేది అంద‌రిలోనూ ఆస‌క్తిని రేకెత్తిస్తోంది.