సూప‌ర్ స్టార్ రజనీకాంత్ న‌టిస్తోన్న తాజా చిత్రం పేట. కార్తీక్ సుబ్బ‌రాజ్ ద‌ర్శ‌క‌త్వంలో రూపొందుతోన్న ఈ సినిమాలో రజనీకాంత్ స‌ర‌స‌న సిమ్రాన్-త్రిష న‌టిస్తున్నారు. ఇక హీరోగా వరుస విజయాలు అందుకుంటున్న విజయ్ సేతుపతి ఇందులో ఒక కీలక పాత్ర పోషిస్తుండ‌డంతో సినిమాపై మ‌రిన్ని అంచ‌నాలు పెరిగాయి. దీనికి తోడు ఈమ‌ధ్య కాలంలో వ‌చ్చిన ర‌జ‌నీ చిత్రాలు ఆశించిన స్ధాయిలో ఆక‌ట్టుకోక‌పోవ‌డంతో అభిమానులు ఈ సినిమా పై చాలా ఆశ‌లు పెట్టుకున్నారు.
తమిళంలో ఈ సినిమాను జనవరి 11వ తేదీన అత్యధిక థియేటర్స్‌లో విడుదల చేస్తున్నారు. అయితే… తెలుగులో సంక్రాంతి పండుగ సందర్భాన్ని పురస్కరించుకుని ఒకరోజు ముందుగానే.. అంటే జనవరి 10వ తేదీనే ఈ సినిమాను విడుదల చేస్తున్నట్టుగా తాజాగా ప్రకటించారు.
జనవరి 9న ఎన్టీఆర్ కథానాయకుడు రిలీజ్ కానుంది. 10న రజనీకాంత్ పేట, 11న రామ్ చ‌ర‌ణ్ వినయ విధేయక రామ, 12న వెంకీ – వ‌రుణ్‌ల ఎఫ్ 2.. ఇలా వ‌రుస‌గా క్రేజీ మూవీస్ థియేటర్లకు రానున్నాయి. దీంతో ఈ సంక్రాంతికి పోటీ మ‌రింత రసవత్తరంగా మారింది. మ‌రి… ఈ సంక్రాంతి పోటీలో విజేత‌గా ఎవ‌రు నిలుస్తారో చూడాలి.