"ఆర్ఆర్ఆర్" ముంగిట మరో రికార్డు - 10 వేల స్క్రీన్లలో రిలీజ్?

ప్రముఖ దర్శకుడు ఎస్ఎస్.రాజమౌళి తెరకెక్కిస్తున్న చిత్రం ఆర్ఆర్ఆర్. జూనియర్ ఎన్టీఆర్, రామ్ చరణ్‌లు హీరోలుగా నటిస్తుంటే, డీవీవీ ఎంటర్‌టైన్మెంట్ బ్యానర్‌పై దానయ్య భారీ బడ్జెట్‌తో నిర్మిస్తున్నారు. ఈ సినిమాలో అజయ్ దేవగన్, సముద్రఖని, శ్రియా, రాహుల్ రామకృష్ణ కీలక పాత్ర పోషిస్తున్నారు.

ఈ మూవీపై మన దేశంతో పాటు ప్రపంచవ్యాప్తంగా ఉన్న ప్రేక్షకుల్లో కూడా భారీ అంచనాలే నెలకొనివున్నాయి. 'బాహుబలి' సినిమాల తర్వాత రాజమౌళి తీస్తున్న సినిమా కావడంతో పాటు తొలిసారిగా ఎన్టీఆర్, చరణ్ కలిసి నటిస్తుండడం ఈ సినిమాకి ఇంత భారీ హైప్ రావడానికి కారణం.

జ‌న‌వ‌రి 7న విడుదల కానున్న ఈ సినిమా ప్ర‌మోష‌న్స్‌లో భాగంగా చిత్రం నుండి పోస్ట‌ర్స్, వీడియోలు విడుద‌ల చేయ‌గా వాటికి భారీ రెస్పాన్స్ రావ‌డంతో సినిమాపై అంచ‌నాలు అమాంతం పెరిగాయి.

అయితే, ఈ సినిమాకి సంబంధించిన ఓ వార్త అంద‌రిలో ఆస‌క్తి క‌లిగిస్తుంది. ఆర్ఆర్ఆర్ సినిమాను ప్రపంచవ్యాప్తంగా దాదాపు 10,000 స్క్రీన్లలో విడుదల అవుతుందని తెలుస్తోంది. ఇదే జరిగితే ఇప్పటివరకు ఇండియన్ హిస్టరీలో బిగ్గెస్ట్ రిలీజ్ అవుతుంది. అందుకు తగిన విధంగా నిర్మాత, సినిమా పంపిణీదారుడైన దిల్ రాజు దృష్టిసారించారు.