ప్రభాస్ హీరోగా బాలీవుడ్ దర్శకుడు ఔం రౌత్ తెరకెక్కిస్తున్న చిత్రం "ఆదిపురుష్". మైథలాజికల్ డ్రామాగా ఈ చిత్రాన్ని రూపొందిస్తున్నారు. ఇప్పటికే విడుదలైన ఈ చిత్రం టీజర్‌కు ప్రేక్షకుల నుంచి మంచి స్పందన వచ్చింది. అయితే, ఈ సినిమాను వచ్చే యేడాది సంక్రాంతి సందర్భంగా జనవరి 12వ తేదీన విడుదల చేయనున్నట్టు మూవీ మేకర్స్ ప్రకటించారు. కానీ, ఈ చిత్రం విడుదల తేదీని మార్చినట్టు పుకారు ఒకటి సోషల్ మీడియాలో విస్తృతంగా ప్రచారం సాగుతోంది.
ఈ చిత్రాన్ని తొలుత ప్రకటించిన తేదీ కంటే ముందుగా లేదా వెనుక అయినా విడుదల చేసే అవకాశం ఉందన్ని ఆ గాసిప్ సారాంశం. అంటే జనవరి మొదటి వారం లేదా ఫిబ్రవరి మొదటి వారంలో విడుదల చేసే అవకాశం ఉన్నట్టు సమాచారం. ఈ పుకార్లకు చిత్ర బృందం తెరదించుతుందో లేదో వేచి చూడాల్సివుంది.
మరోవైపు, ఈ చిత్రంలో శ్రీరాముడిగా ప్రభాస్, సీతగా బాలీవుడ్ బ్యూటీ కృతి సనన్, రావణాసురుడి పాత్రలో సైఫ్ అలీఖాన్, లక్ష్మణుడి పాత్రలో సన్నీ లింగ్, హనుమంతుడుగా దేవ్‌దత్తాలు నటిస్తున్నారు. ఈ చిత్రానికి సాచెట్ -పరంపర సంగీతాన్ని సమకూర్చారు. టీ సిరీస్, రెట్రోఫైల్స్ సంస్థలు కలిసి భారీ బడ్జెట్‌తో తెరకెక్కించాయి.