అలాంటి కామెంట్స్ చూసి బీపీలు తెచ్చుకోవడం అవసరమా? నీహారిక ప్రశ్న
గురువారం, 18 మే 2023 (09:57 IST)
ఉదయం నిద్రలేచినప్పటి నుంచి సాయంత్రం వరకు సోషల్ మీడియాలో వచ్చే కామెంట్స్ చూసి బీపీలు తెచ్చుకోవడం అవసరమా? అని మెగా డాటర్ నిహారిక ప్రశ్నిస్తున్నారు. ఆమె ప్రధాన పాత్రగా పోషించిన వెబ్ సిరీస్ "డెడ్ పిక్సెల్". ఆదిత్య మండల దర్శకత్వం వహించారు ఈ నెల 19వ తేదీ నుంచి డిస్నీ ప్లస్ హాట్ స్టార్‌లో స్ట్రీమింగ్ కానుంది. ఈ వెబ్ సిరీస్ ప్రమోషన్స్‌‍లో నిహారిక బిజీగా ఉన్నారు. తాజాగా ఆమె తనపై వచ్చే కామెంట్స్‌పై స్పందించారు.
తన కెరియర్‌ ప్రారంభంలో నాపై వచ్చిన కామెంట్స్‌ను పట్టించుకుని చాలా బాధపడేదాన్ని. ఆ తర్వాత వాటిని లైట్‌గా తీసుకోవడం మొదలుపెట్టాను. ఒకసారి ఒక ఆడియో లాంచ్‌లో నేను ఒక స్టేజ్‌పై కంఫర్టబుల్‌గా ఉంటుందనే ఉద్దేశ్యంతో కాలుపై కాలు వేసుకుని కూర్చుంటే.. నాకు చాలా పొగరు అంటూ రాసుకొచ్చారు అని గుర్తుచేశారు.
పొద్దునే చీరకట్టుకుని, పూజ చేసుకుని మఠం వేసుకుని కూర్చున్నా.. ఏదో ఒక కామెంట్ చేసేవాళ్లు వందమంది ఉంటారు. ఎందుకంటే వాళ్లకు పనీపాట లేదు. అలాంటి కామెంట్స్ చూడటం, బీపీలు తెచ్చుకోవడం అవసరమా, అందువల్లే నేను కామెంట్స్ చూడను. చూసినీ అస్సలు పట్టించుకోను అని నిహారిక సెలవిచ్చారు. అలాంటివే తన అన్న వరుణ్ తేజ్ - లావణ్య త్రిపాఠి పెళ్లిపై వస్తున్న వార్తలు అంటూ కొట్టిపారేశారు.