అవును.. నాకూ ఆ అనుభవం వుంది.. కానీ చెప్పుతో కొట్టా: ముంతాజ్

దేశ వ్యాప్తంగా ''మీ టూ'' ఉద్యమం ఊపందుకున్న నేపథ్యంలో సినీ తారలు తమకు ఎదురైన అనుభవాల గురించి నోరు విప్పుతున్నారు. ఇప్పటికే మీ టూ ఉద్యమంతో భారత విదేశాంగ సహాయ మంత్రి ఎంజే అక్బర్ పదవి ఊడిన సంగతి తెలిసిందే. ఈ నేపథ్యంలో తమిళ బిగ్ బాస్‌లో పార్టిసిపేట్ చేసిన ఐటమ్ గర్ల్ ముంతాజ్ కూడా మీ టూ స్పందించింది. ఇంకా పవన్ కల్యాణ్ నటించిన ఖుషీ సినిమాలో కనిపించిన ముంతాజ్  ఫేమ్ ముంతాజ్ తనకు సినీ పరిశ్రమలో ఎదురైన లైంగిక వేధింపులను చెప్పుకొచ్చింది. 

ఈ సందర్భంగా ముంతాజ్ మాట్లాడుతూ.. తనకు లైంగిక వేధింపులు ఎదురయ్యాయని చెప్పింది. ఇలాంటి చేదు అనుభవాలు చాలానే వున్నాయని చెప్పుకొచ్చింది. ఓ దర్శకుడు సినిమా షూటింగ్ సందర్భంగా తనకు అసభ్యంగా ప్రవర్తించాడని.. అయితే తాను మిన్నకుండిపోలేదని.. వెంటనే చెప్పు తీసుకుని కొట్టానని తెలిపింది. ఈ వ్యవహారంపై నడిగర్ సంఘానికి వెంటనే ఫిర్యాదు చేశానని.. వాళ్లు జోక్యం చేసుకుని వివాదాన్ని పరిష్కరించారని తెలిపింది. 

ఈ వివాదం గొడవగా మారినా అతడిలో మార్పు రాలేదని.. అప్పటికీ అతనిని బూతులు తిట్టానని.. ఆ తర్వాత నుంచి తన జోలికి రావటం మానేశాడని చెప్పుకొచ్చింది. అంతేకాదు.. ఎప్పుడైనా కనిపిస్తే రండి మేడమ్.. కూర్చోండి మేడమ్.. ఏం తీసుకుంటారు? అని మర్యాదగా ప్రవర్తించేవాడని తెలిపింది. మీ టూ వ్యవహారంలో ఇద్దరి వాదనలు వినాలని ముంతాజ్ కోరింది.