మెగాస్టార్ చిరంజీవి తల్లి అంజనా దేవి పుట్టిన రోజు వేడుకలు జరుపుకున్నారు. ఈ సందర్భంగా చిరంజీవి ఇంట్లో ఆమె ముగ్గురు కుమారులు, ఇద్దరు కుమార్తెలు ఒక్కచోట కలిశారు. మెగాస్టార్ చిరంజీవి, మెగా బ్రదర్ నాగేంద్రబాబు, పవర్ స్టార్ పవన్ కళ్యాణ్‌లతో పాటు ఇద్దరు అక్కలు కూడా అక్కడకు చేరారు. ఈ సందర్భంగా తమ సోదరీమణులతో మెగా బ్రదర్స్ ఉన్న ఫోటో ఒకటి ఇపుడు సోషల్ మీడియాలో చక్కర్లు కొడుతోంది. తన తల్లి పుట్టిన రోజును పురస్కరించుకుని చిరంజీవి ఓ ట్వీట్ చేశారు.
"ఈ రోజు మాకు జన్మని, జీవితాన్ని ఇచ్చిన అమ్మ పుట్టినరోజు. జన్మజన్మలు నీకే బిడ్డలుగా పుట్టాలని కోరుకుంటున్నాను అమ్మా.. నీకు పుట్టిన రోజు శుభాకాంక్షలు" అంటూ ట్వీట్ చేశారు. ఈ ఫోటోలో తన తల్లికి కుడిఎడమలుగా చిరంజీవి, నాగబాబు నిలబడగా మధ్యలో పవన్ కళ్యాణ్ తన ఇద్దరు అక్కల భుజాలపై చేయి వేసుకుని నిలబడివున్నారు. ఈ ఫోటో ఎంతో చూడముచ్చటగా ఉండటంతో వైరల్ అవుతోంది.