మెగా హీరోల్లో ఒకరైన వరుణ్ తేజ్ త్వరలోనే పెళ్లీ పీటలెక్కనున్నారు. మెగా బ్రదర్ నాగబాబు కుమారుడైన వరుణ్ తేజ్.. టాలీవుడ్ హీరోయిన్ లావణ్య త్రిపాఠిని వివాహం చేసుకోనున్నారనీ, వీరిద్దరికీ ఈ నెల 9వ తేదీన నిశ్చితార్థం జరుగనుందనే వార్తలు చక్కర్లు కొడుతున్నాయి. ఈ నిశ్చితార్థ వేడుకకు కుటుంబ సభ్యులు, కొంతమంది అతిథులను మాత్రమే ఆహ్వానించారు.
అయితే, పెళ్లి ఎపుడనేది ఇంకా తెలియలేదు. తాము మంచి స్నేహితులమని ఇంతకాలం చెప్పుకుంటూ వచ్చిన వీరిద్దరూ ప్రస్తుతం విదేశీ పర్యటనలో ఉన్నారు. జూన్ ఒకటో తేదీన వీరిద్దరూ హైదరాబాద్ నగరానికి చేరుకుంటారు. ఆ తర్వాత వీరిద్దరి నిశ్చితార్థంపై మెగా ఫ్యామిలీ ఓ ప్రకటన విడుదల చేసే అవకాశం ఉంది.
కాగా, తాను రోమ్‌లో ఉన్నట్టు వరుణ్ తేజ్ ఇటీవల ఇన్‌స్టా గ్రామ్ ఖాతాలో ఓ ఫోటోను షేర్ చేసిన విషయం తెల్సిందే. అలాగే, లావణ్య కూడా తాను టూర్‌లో ఉన్నట్టు ప్రకటించారు. దీంతో వీరిద్దరూ కలిసే ప్రయాణం చేస్తున్నారంటూ నెటిజన్లు కామెంట్స్ చేయసాగారు. వీరిద్దరూ కలిసి కొన్ని సినిమాల్లో నటించగా, గత 2017 నుంచి వీరిద్దరూ ప్రేమలో ఉన్నట్టు సమాచారం.