హీరో ఇంటిముందు నిప్పంటించుకుని సూసైడ్ చేసుకున్న వీరాభిమాని.. ఎందుకు?

వీరాభిమాని ఒకరు హీరో ఇంటి ముందు శరీరంపై కిరోసిన్ పోసుసుని నిప్పంటించుకుని ప్రాణాలు తీసుకున్నాడు. తమ అభిమాన హీరో పుట్టిన రోజునాడు ఆయన్ను స్వయంగా కలిసి పుట్టినరోజు శుభాకాంక్షలు తెలిపేందుకు వెళ్లాడు. కానీ, హీరోను కలిసేందుకు సెక్యూరిటీ సిబ్బంది అనుమతించలేదు. దీంతో తీవ్ర మనస్తాపానికి గురైన ఆ అభిమాని ఆత్మహత్య చేసుకున్నాడు. ఈ ఘటన కర్ణాటక రాష్ట్రంలో జరిగింది. ఈ వివరాలను పరిశీలిస్తే, 

కన్నడ స్టార్ యష్ తన పుట్టిన రోజు ఈనెల 8వ తేదీ. కానీ, సీనియర్ హీరో అంబరీష్ మృతితో ఆయన తన పుట్టినరోజు వేడుకలను రద్దు చేసుకున్నారు. ఈ విషయాన్ని ట్విట్టర్ ఖాతాద్వారా వెల్లడించారు. ఈ నేపథ్యంలో హీరో యష్‌ను చూసేదుకు బెంగుళూరు శాంతి నగర్‌కు చెందిన రవి అనే వీరాభిమాని హీరో ఇంటికెళ్లాడు. 

కానీ, అక్కడ హీరో ఇంటిలోపలికి వెళ్లేందుకు సెక్యూరిటీ సిబ్బంది అనుమతించలేదు. దీంతో మనస్థాపానికి గురైన రవి పెట్రోల్ పోసుకుని ఆత్మహత్యాయత్నానికి పాల్పడ్డాడు. ప్రస్తుతం 75 శాతం కాలిన గాయాలతో ఆస్పత్రిలో చికిత్స పొందుతూ గురువారం కన్నుమూశారు. ఈ విషయం తెలుసుకున్న హీరో యష్.. మృతుని కుటుంబానికి తన ప్రగాఢ సంతాపం తెలిపారు.