మామూలుగానే తెలుగు.. తమిళ భాషలలో కథానాయికగా కీర్తి సురేష్‌కి మంచి క్రేజ్ ఉండేది. 'మహానటి' సినిమా తర్వాత నటన పరంగానూ.. గ్లామర్ పరంగానూ ఆవిడకి మంచి ఫాలోయింగ్ ఏర్పడింది. అయితే.. 'మహానటి' తరువాత మంచి కథ కోసం ఎదురుచూస్తూ.. తమిళంలో వరుస సినిమాలు చేసుకుంటూ వెళ్లిన ఆమె ఈ నేపథ్యంలోనే తెలుగులో ఒక కథ నచ్చడంతో చేయడానికి వెంటనే గ్రీన్ సిగ్నల్ ఇచ్చినట్లు సమాచారం.
ఈస్ట్ కోస్ట్ ప్రొడక్షన్స్‌లో మహేష్ కోనేరు ఈ సినిమాను నిర్మిస్తున్న ఈ సినిమా ద్వారా... నరేంద్రనాథ్ దర్శకుడిగా పరిచయం కానున్నాడు. హీరోయిన్ ఓరియెంటెడ్‌గా సాగే ఈ సినిమా ఇటీవలే సెట్స్‌పైకి వెళ్లిందట. రాజేంద్రప్రసాద్, సీనియర్ నరేష్, నదియా, కమల్ కామరాజులను ఈ సినిమాలోని తదితర ముఖ్య పాత్రల కోసం తీసుకున్నట్లు సమాచారం. అందుకు సంబంధించిన ప్రత్యేక పోస్టర్‌ను కూడా ఇటీవల విడుదల చేసారు. మరికొంతమంది నటీనటుల పేర్లను త్వరలోనే తెలియజేయనున్నట్టు యూనిట్ సభ్యులు చెప్పుకొచ్చారు.