తల్లిదండ్రులు పోవడంతో ఒంటరితనం.. ఇపుడు నేనూ - నా బిడ్డ మాత్రమే ఉన్నాం : గౌతమి

తెలుగు, తమిళ, మలయాళ భాషల్లో ఒకేసమయంలో హీరోయిన్‌గా రాణించిన అతికొద్ది మంది హీరోయిన్లలో గౌతమి ఒకరు. అయితే, ఈమె వ్యక్తిగత జీవితంలో సినిమా కష్టాలను చవిచూశారు. వైవాహిక జీవితం మొదలుకుని వ్యక్తిగత జీవితం వరకు అనేక కష్టాలు అనుభవించారు. ఇపుడు తన ఏకైక కుమార్తె కోసం ఆమె జీవిస్తున్నారు. 

తాజాగా ఆమె ఇచ్చిన ఓ ఇంటర్వ్యూలో మాట్లాడుతూ, తన తల్లిదండ్రులు పోవడంతో ఒంటరితనాన్ని అనుభవించినట్టు చెప్పారు. ముఖ్యంగా, వైవాహిక జీవితంలో అనేక ఒడి దుడుకులు ఎదుర్కొన్నానని తెలిపారు. పైగా, అది ఒక పరీక్షా కాలంగా ఆమె అభివర్ణించారు. 

"మా తల్లిదండ్రులు ఎంతో గారాబంగా పెంచారు. అగ్గిపుల్ల కూడా గీయడం నాకు చేతకాదు. అలా పెంచారు. నా 16వ యేటనే హీరోయిన్‌గా అవకాశం వచ్చింది. నాకు పాప పుట్టిన తర్వాత నేను సింగిల్ పేరెంట్‌గా ఉన్నాను. చేతుల్లో పసిబిడ్డను పట్టుకుని మా తల్లిదండ్రుల వద్దకు వచ్చేశాను. ఆ తర్వా అమ్మ చనిపోయారు. అప్పటి నుంచి మా నాన్న నా గురించే ఆలోచించేవారు. ఒక యేడాది తర్వాత ఆయన కూడా పోయారు. 

ప్రస్తుతం నేను, నా బిడ్డ మాత్రమే మిగిలిపోయాం. ఇంటిపట్టునే ఉండిపోవడంతో మనుషులను సరిగ్గా అంచనా వేయలేకపోయాను. ఎవరు ఎలాంటివారు అనేది తెలుసుకోవడానికి నాకు చాలా సమయం పట్టింది" అని గౌతమి చెప్పుకొచ్చారు. కాగా, ఈమె హీరో కమల్ హాసన్‌తో కొంతకాలం సహజీవనం చేసి ఆ తర్వాత వేరుపడిన విషయం తెల్సిందే.