ప్రభాస్ హీరోగా, కమల్ హాసన్ విలన్‌గా నటిస్తున్న చిత్రం కల్కి 2898 ఏడీ. ఈ చిత్రం కోసం అభిమానులతో పాటు సినీ ప్రియులంతా ఎదురుచూస్తున్నారు. ఇటీవల విడుదలైన దీని గ్లింప్స్‌ సినిమాపై అంచనాలను అమాంతం పెంచేసింది. దీంతో ఈ సినిమా కోసం ప్రేక్షకులు ఎదురు చూస్తున్నారు. అయితే దీనికి సంబంధించిన ఓ వార్త ప్రస్తుతం సోషల్ మీడియాలో చక్కర్లు కొడుతోంది. అది చూసిన సినీప్రియులు కాస్త నిరాశకు గురవుతున్నారు.
నాగ్‌ అశ్విన్‌ దర్శకత్వంలో వస్తోన్న ఈ సినిమా విడుదల వాయిదా తప్పదనే వార్తలు వినిపిస్తున్నాయి. ఈ ప్రాజెక్ట్‌ను ప్రకటించినప్పుడు వచ్చే ఏడాది సంక్రాంతికి దీన్ని విడుదల చేసే ఆలోచనలో ఉన్నట్లు మేకర్స్‌ వెల్లడించారు.
అయితే ఇటీవల జరిగిన 'శాన్‌ డియాగో కామిక్ కాన్‌' ఈవెంట్లో ఈ చిత్ర విడుదల తేదీపై స్పష్టత వస్తుందని అంతా అనుకున్నారు. కానీ మేకర్స్‌ ఈ విషయంపై ఎలాంటి ప్రకటన చేయలేదు. తాజాగా దర్శకధీరుడు రాజమౌళి కూడా ఈ సినిమాను ఎప్పుడు విడుదల చేస్తారని ట్వీట్‌ చేసిన విషయం తెలిసిందే.
దానికి కూడా 'కల్కి' చిత్రబృందం సమాధానం చెప్పలేదు. దీంతో ఈ సినిమా రిలీజ్ డేట్‌ వాయిదా వార్తలు జోరందుకున్నాయి. ఈ సినిమా రెండు భాగాలుగా రానుందని మొదటి పార్ట్‌ను మే 9న విడుదల చేయనున్నారని టాక్ వినిపిస్తోంది.
ఆ రోజు అశ్వనీదత్‌కు చాలా సెంటిమెంట్‌ అని తెలుస్తోంది. అశ్వనీదత్‌కు మే 9వ తేదీన విడుదలైన 'మహానటి' మళ్లీ బ్లాక్‌ బస్టర్‌ అందించింది. అలాగే చిరంజీవి నటించిన 'జగదేక వీరుడు అతిలోక సుందరి' కూడా అదే రోజు రిలీజ్ అయి వసూళ్ల వర్షం కురిపించింది. దీంతో ఈ భారీ బడ్జెట్‌ సినిమాకు కూడా ఆయన ఇదే సెంటిమెంట్‌ను ఫాలో అవుతారని అనుకుంటున్నారు.
కానీ, 'కల్కి' వీఎఫ్‌ఎక్స్‌ వర్క్‌కు కూడా చాలా సమయం పట్టేలా కనిపిస్తుంది. దీంతో ఈ సినిమా వాయిదా వేయడమే సరైందని మేకర్స్‌ భావిస్తున్నట్లు సమాచారం. అయితే దీనిపై మేకర్స్‌ ఎలాంటి అధికారిక ప్రకటన చేయలేదు. సోషల్ మీడియాలో మాత్రం సంక్రాంతికి వాయిదా వేసినట్టు జోరుగా ప్రచారం సాగుతోంది.