తమన్నాకు బూస్ట్‌లా పని చేసిన ఎఫ్2..

బాహుబలి సినిమా పెద్ద హిట్ అయినా కానీ తమన్నాకు మాత్రం అవకాశాలు చాలా తక్కువగానే వచ్చాయి. వాటిలో కూడా విజయం సాధించిన సినిమాలు ఏవీ లేవు. కెరీర్ గ్రాఫ్ పడిపోతున్న తమన్నాకు ఇటీవల విడుదలై ఘన విజయం సాధించిన ఎఫ్2 చిత్రంతో మళ్లీ బూస్ట్ వచ్చినట్లయింది.

ప్రస్తుతం మిల్కీ బ్యూటీ బాలీవుడ్ హిట్ సినిమా 'క్వీన్' రీమేక్ సినిమా 'దటీజ్ మహాలక్ష్మి'లో నటిస్తుండగా, మరోవైపు చిరంజీవి 'సైరా నరసింహారెడ్డి'లో ప్రధాన పాత్ర పోషిస్తోంది. ఎఫ్2 చిత్రం సక్సెస్‌తో ఇప్పుడు తమన్నా 'అభినేత్రి' సినిమా సీక్వెల్‌కు కూడా సంతకం చేసినట్లు సమాచారం.

ఇవే కాకుండా తిరు దర్శకత్వంలో గోపీచంద్‌కు జంటగా కూడా నటిస్తోంది. ఈ సినిమా భారత్ పాకిస్థాన్ దేశాల మధ్య గూఢచర్యం నేపథ్యంలో ఉండటం, ఇందులో తమన్నా పాకిస్తాన్‌కు చెందిన ఐఎస్ఐ గూఢచారి పాత్రలో నటిస్తుండటంతో సినిమాకు హైప్ వస్తోంది. ప్రస్తుతం రాజస్థాన్‌లో సరిహద్దుల్లో తమన్నా షూటింగ్‌లో బిజీగా ఉంది.