మెగా ఫ్యామిలీ హీరో సాయి ధరమ్ తేజ్ నటిస్తున్న తాజా చిత్రం "చిత్రలహరి". 'నేను శైలజ' ఫేమ్ తిరుమల కిషోర్ దర్శకత్వంలో రూపొందిన ఈ చిత్రంలోని రెండో లిరికల్ సాంగ్‌ను తాజాగా విడుదల చేశారు. ఈ చిత్రంలో హీరోయిన్లుగా కళ్యాణి ప్రియదర్శన్, నివేదా పేతురాజ్‌లు నటించారు. మైత్రీ మూవీ మేకర్స్ బ్యానర్‌పై నవీన్ ఎర్నేని, యలమంచిలి రవిశంకర్, చెరుకూరి మోహన్ ఈ చిత్రాన్ని నిర్మిస్తుండగా, దేవీశ్రీ ప్రసాద్ సంగీతం సమకూర్చుతున్నారు. ఈ చిత్రం వచ్చే నెల 12వ తేదీన ప్రేక్షకుల ముందుకురానుంది.
ఇప్పటికే విడుదలైన ట్రైలర్‌కు ప్రేక్షకుల నుంచి మంచి స్పందన వచ్చింది. అలాగే ఇటీవల విడుదలైన 'పరుగు పరుగు' పాట కూడా ప్రేక్షకులను ఆకట్టుకుంది. ఇప్పుడు ఈ సినిమాలోనే రెండో పాట క్లాస్‌మేట్స్, సోల్‌మేట్స్, రూమ్‌మేట్స్ ఇలా అందరికి ఎక్కడో చోట ఫుల్‌స్టాప్ ఉంటుంది కాని.. ఏ ఎండు లేని వాడే మందు పంచుకునే గ్లాస్‌మేట్స్.. గలగలగల గలగలగల గ్లాస్‌మేట్సూ.. అంటూ సాగే ఈ పాట మందు బాబులను ఎంతో ఆకట్టుకునేలా ఉంది.
ఈ పాటను రాహుల్ సిప్లిగంజ్, పెంచల్ దాస్, దేవీశ్రీ ప్రసాద్‌లు ఆలపించారు. యూత్‌కు ఇట్టే కనెక్ట్ అయిపోయేలా ఉంది. అంతేకాదు ఈ పాటలో సునీల్‌తో కలిసి సాయి ధరమ్ తేజ్ చేసిన అల్లరి ఓ రేంజ్‌లో ఉంటుందని చిత్ర యూనిట్ చెబుతోంది.
ఇకపోతే, ఈ చిత్రం పాటలోని ఆడియోలో ఎవరికీ తెలియని ఓ అమ్మాయి ఓ వాయిద్యాన్ని వాయిస్తూ కనిపిస్తుంది. ఆ వాయిద్యాన్ని సారంగి అంటారు. దాన్ని వాయిస్తున్న అమ్మాయి పేరు మనోన్మణి. దక్షిణాది భారతదేశం నుంచి ఈ వాయిద్యాన్ని వాయించిన తొలి మహిళ మనోన్మణి. ఈ చిత్ర నిర్మాతలు రంగస్థలం వంటి భారీ హిట్ చిత్రం తర్వాత నిర్మిస్తున్న చిత్రం కావడంతో దీనిపై భారీ అంచనాలే నెలకొనివున్నాయి.