అవెంజర్స్ ఎండ్ గేమ్‌కు విపరీతమైన క్రేజ్... ఎందుకంటే?

మార్వెల్ సంస్థ నుంచి ఇప్పుడు వస్తోన్న ఎవెంజర్స్ ది ఎండ్ గేమ్ సినిమాకు ప్రపంచవ్యాప్తంగా భారీ డిమాండ్ ఉంది. జనాల్లో ఈ సినిమా పట్ల పిచ్చి పీక్స్‌కు చేరింది. చాలా రోజుల నుంచే ఈ సినిమా టికెట్‌ల కోసం ప్రజలు విపరీతంగా ప్రయత్నాలు చేస్తున్నారు.

అమెరికాలో అయితే మొదటి మూడు రోజులకు టికెట్‌ల బుకింగ్స్ పూర్తయ్యాయి. కొన్ని దేశాల్లో అయితే రోజుకు 100 షోలు వేస్తున్నా కూడా సరిపోవడం లేదట. విడుదల చేసిన క్షణాల్లో టికెట్‌లు అమ్ముడు పోతూ రికార్డులు సృష్టిస్తోంది ఈ సినిమా.

కేవలం అమెరికాలోనే మొదటి మూడు రోజుల్లో ఈ సినిమా దాదాపుగా $300 మిలియన్ డాలర్లు వసూలు చేయవచ్చని హాలీవుడ్ ట్రేడ్ వర్గాల అంచనా. భారతదేశంలో కూడా ఈ సినిమాకు భారీ ఓపెనింగ్స్ వస్తాయని అంచనా.

ఎవెంజర్స్ సినిమాకు ఇలా విపరీతమైన డిమాండ్ ఏర్పడటానికి కారణం ఏమిటి, ప్రేక్షకులు ఈ సినిమా కోసం ఎందుకు అంతగా పడిగాపులు కాస్తున్నారంటే... గతంలో ఎవెంజర్స్ సీరీస్‌లో విడుదలైన మూడు సినిమాలు కూడా అఖండ విజయాన్ని సాధించాయి. 

ముఖ్యంగా మూడో సినిమా ఎవెంజర్స్ ఇన్ఫినిటీ వార్ అయితే కలెక్షన్ల సునామీ సృష్టించింది. దీంతో నాలుగో సీరీస్‌పై అంచనాలు అమాంతం పెరిగాయి.

ఇంకా ఈ సిరీస్‌లో ఇదే చివరి సినిమా అని మార్వెల్ సంస్థ ప్రకటించడంతో డిమాండ్ మరింత ఊపందుకుంది. చూస్తుంటే ఈ సినిమా ఇప్పటి వరకున్న ప్రపంచ రికార్డులన్నింటిని బద్దలుకొట్టేలా కనిపిస్తోంది.