సాధారణంగా కవలలు కాకుండా మనిషిని పోలిన మనుషులు ఏడుగురు ఉంటారని వింటూ ఉంటాం. అసలు ఎలాంటి బంధుత్వమూ, సంబంధమూ లేకుండా ఇద్దరు మనుషులు ఒకేలా ఉండటం చాలా అరుదుగా జరుగుతూ ఉంటుంది. కొన్ని రోజుల క్రితం ఆంధ్రప్రదేశ్ ముఖ్యమంత్రి చంద్రబాబుని పోలిన ఓ వ్యక్తి ఫోటోలు సామాజిక మాధ్యమాలలో తెగ వైరలయిన సంగతి తెలిసిందే.
ప్రస్తుతం అచ్చు గుద్దినట్లు బాలీవుడ్‌ నటి అనుష్క శర్మను పోలి ఉండే ఒక యువతి ఫోటోలు కూడా తెగ వైరలవుతున్నాయి. అయితే అనుష్కను పోలిన వ్యక్తి కూడా ఓ సెలబ్రిటీనే కావడం ఇక్కడ మరో విశేషం. వివరాలలోకి వెళ్తే.. అమెరికన్‌ సింగర్‌ జూలియా మైకేల్స్ కొన్ని రోజుల క్రితం తన ఫోటోను సామాజిక మాధ్యమాలలో పోస్ట్‌ చేసారు.
అయితే ఈ ఫోటోలో జూలియాను చూసిన వారెవరైనా అనుష్క శర్మ అనే అనుకుంటారు. ఒక్క జుట్టు రంగు మినహాయిస్తే పూర్తిగా అనుష్కలాగానే ఉన్నారు జూలియా మైకేల్స్. ప్రస్తుతం ఈ ఫోటో తెగ వైరల్ అయిపోవడమే కాకుండా నెటిజన్లు జూలియాను అనుష్క డూప్‌గా పోల్చేస్తూ... ‘కోహ్లీ.. వదిన పేరు మార్చుకుందా.. ఏంటి’ అంటూ కామెంట్‌లు కూడా చేస్తున్నారు.