టాలీవుడ్ హీరో అల్లు అర్జున్ హైదరాబాద్ చంచల్‌గూడ జైలు నుంచి విడుదలయ్యారు. శనివారం హైకోర్టు మధ్యంత బెయిల్ కాపీని జైలు సూపరింటెండ్‌కు అందజేయడంతో ఆ వెంటనే విడుదల ప్రక్రియను ప్రారంభించారు. అల్లు అర్జున్ న్యాయవాదులు రూ.50వేల పూచీకత్తును జైలు సూపరింటెండెంట్‌కు సమర్పించారు. ఆ వెంటనే జైలు నుంచి విడుదల చేయగా.. అల్లు అర్జున్‌ను చంచల్‌గూడ జైలు వెనుక గేటు నుంచి పోలీసులు పంపించారు.
మరోవైపు అల్లు అర్జున్ లాయర్ కీలక వ్యాఖ్యలు చేశారు. వాస్తవానికి హైకోర్టు బెయిల్ మంజూరు చేసిన కాపీలను జైలు అధికారులకు ముందే అందజేశామని.. కానీ ఎందుకు విడుదల చేయలేదో తెలియడం లేదన్నారు.
శుక్రవారం మధ్యాహ్నం అల్లు అర్జున్‌ను సంధ్య థియేటర్‌ వద్ద జరిగిన తొక్కిసలాట ఘటన కేసులో అరెస్ట్ చేయగా.. అల్లు అర్జున్‌కు నాంపల్లి కోర్టు 14 రోజుల రిమాండ్ విధించడంతో చంచల్‌గూడ జైలుకు తరలించారు. ఈ క్రమంలో తెలంగాణ హైకోర్టు నాలుగు వారాలపాటు మధ్యంతర బెయిల్ మంజూరు చేసింది.
హైకోర్టు ఉత్వర్వులు అప్‌లోడ్‌ చేసేసరికి రాత్రి 10.30 గంటలు దాటిపోవడంతో ఆయనను శనివారం ఉదయం విడుదల చేస్తామని జైలు అధికారులు తెలిపారు. దీంతో రాత్రంతా అల్లు అర్జున్ జైల్లోనే ఉండాల్సిన పరిస్థితి వచ్చింది.