బెంగుళూరుకు చెందిన ఓ బిడ్డ తల్లి గౌరీ స్ప్రత్‌తో పాతికేళ్లుగా స్నేహబంధం కొనసాగుతుందని, గత యేడాదికాలంగా ఆమెతో డేటింగ్ చేస్తున్నట్టు బాలీవుడ్ నటుడు అమీర్ ఖాన్ వెల్లడించారు. తన 60వ పుట్టిన రోజు వేడుకను పురస్కరించుకుని ఆయన మీడియాతో మాట్లాడారు. ఈ సందర్భంగా తన డ్రీమ్ ప్రాజెక్టు 'మహాభారతం', బాలీవుడ్ హీరో సల్మాన్ ఖాన్, షారూక్ ఖాన్‌లతో స్నేహం, గౌరీతో డేటింగ్ తదితర అంశాలపై ఆయన మనసువిప్పి మాట్లాడారు.
ముఖ్యంగా గౌరీతో గత పాతికేళ్ళుగా స్నేహం ఉందన్నారు. అయితే, గత యేడాది కాలంగా తామిద్దరం డేటింగ్‌లో ఉన్నట్టు చెప్పారు. బెంగుళూరుకు చెందిన ఆమె తన ప్రొడక్షన్ హౌస్‌లో పని చేస్తున్నారని తెలిపారు. పైగా, గౌరీకి ఆరేళ్ల కుమారుడు కూడా ఉన్నాడని చెప్పాడు. 2021లో తన భార్య కిరణ్ రావుతో అమీర్ విడాకులు తీసుకున్న విషయం తెల్సిందే. అంతకుముందు ఆయన రీనా దత్తాను పెళ్లి చేసుకుని విడాకులు తీసుకున్నారు.
తన డ్రీమ్ ప్రాజెక్టు 'మహాభారతం' స్క్రిప్టు పనులు ప్రారంభించినట్టు చెప్పారు. స్క్రిప్టు వర్క్ మాత్రమే మొదలు పెడుతున్నామన్నారు. దీనికోసం ఒక టీమ్‌ను సిద్ధం చేసే పనిలో ఉన్నామన్నారు. ఈ భారీ ప్రాజెక్టు కోసం తాము ఎన్నో విషయాల గురించి అన్వేషిస్తున్నామని, ఏం జరుగుతుందో చూడాలన్నారు. ఇకపోతే సల్మాన్, షారూక్ ఖాన్‌లతో మంచి అనుబంధం ఉందన్నారు. బుధవారం కూడా వారిద్దరిని కలిసినట్టు చెప్పారు. తమపై మీడియాలో వచ్చే గాసిప్స్‌పైనే ప్రధానంగా తమ మధ్య చర్చ జరిగిందని తెలిపారు.