పక్షిరాజా ముందు తేలిపోయిన చిట్టి? : '2.O' మూవీకి 4 స్టార్ రేటింగ్

శంకర్ దర్శకత్వంలో తెరకెక్కిన చిత్రం "2.O". ఈ చిత్రం గురువారం ప్రపంచ వ్యాప్తంగా విడుదలై సూపర్ హిట్ టాక్‌ను తెచ్చుకుంది. ఈ చిత్రంలో హీరో రజనీకాంత్, విలన్ అక్షయ్ కుమార్‌ల నటనకు ప్రశంసల వర్షం కురుస్తోంది. వీరిద్దరి కష్టానికి తగిన ప్రతిఫలం దక్కిందని పేర్కొంటూ అనేక మంది సినీ విమర్శకులు ఈ చిత్రానికి ఫోర్‌స్టార్ రేటింగ్ ఇస్తున్నారు. అయితే, అక్షయ్ యాంగ్రీ విలనిజం ముందు చిట్టి తేలిపోయాడని కొందరు విమర్శకులు అభిప్రాయపడుతున్నారు. 

ముఖ్యంగా, ప్రముఖ సినీ విమర్శకుడు, సెన్సార్ బోర్డు సభ్యుడు ఉమైర్ సంధు తన రివ్యూలో ఈ చిత్రానికి 4 స్టార్ రేటింగ్ ఇచ్చి, ట్విట్టర్ ఖాతాలో వెల్లడించారు. ఈ చిత్రం గురించి చెప్పాల్సివస్తే ప్రధానంగా హీరో, విలన్ పాత్రల గురించే తొలుత చెప్పుకోవాల్సి వస్తుందన్నారు. ముఖ్యంగా, అక్షయ్ కుమార్ యాంగ్రీ విలన్‌గా అదరగొట్టాడని పేర్కొన్నారు. 

వీటితోపాటు వీఎఫ్‌ఎక్స్, సౌండ్, సినిమాటోగ్రఫీ మరీ ముఖ్యంగా స్క్రీన్ ప్లే అద్భుతమని, భారతీయ దర్శకుడు తన కలను నెరవేర్చుకునేందుకు చూపిన తెగువ ప్రశంసించదగినదని రాశారు. పైగా, '2.O' తప్పకుండా చూడాల్సిన చిత్రమన్నారు. 

నేడు దీన్ని బాక్సాఫీస్ బ్లాక్ బస్టర్‌గా పిలవాలన్నారు. కానీ, రేపటి నుంచి మాత్రం ఇది ఓ క్లాసికల్‌గా గుర్తుండిపోతుందన్నారు. '2.O' ఫాదర్ ఆఫ్ ఆల్ మూవీస్ అని ఈ చిత్రం మైండ్‌లో ఒక అద్భుతాన్ని ఆవిష్కరిస్తుందని ఉమైర్ సంధు రాసిన రివ్యూలో పేర్కొన్నారు.