శాండిల్‌వుడ్‌లోకి ఎంట్రీ అవుతున్న మిల్కీ బ్యూటీ

తెలుగులో తెల్లపిల్లగా గుర్తింపు పొందిన హీరోయిన్ తమన్నా. ఈ అమ్మడుకు ఇటీవలి కాలంలో తెలుగు, తమిళ భాషల్లో సినీ అవకాశాలు తగ్గిపోయాయి. దీంతో కన్నడ, మలయాళం వంటి చిత్రసీమలపై కన్నేసింది. ఇందులోభాగంగా, తాజాగా కన్నడంలో ఆమె ఎంట్రీ ఇచ్చేందుకు సిద్ధమైంది. 

నిజానికి గతంలో కన్నడ వెండితెరపై తమన్నా మెరిసింది. అయితే, సినిమాలో హీరోయిన్‌గా మాత్రం కాదు. 'జాగ్వార్', 'కేజీఎఫ్' తొలి భాగం చిత్రాల్లో ఆమె ప్రత్యేక గీతాల్లో నర్తించింది. అంతేకానీ, పూర్తిస్థాయి హీరోయిన్‌గా ఏ శాండిల్‌వుడ్ సినిమాలోనూ న‌టించ‌లేదు. ఈ క్రమంలో ఆమెకు ఓ పాన్ ఇండియా మూవీలో నటించేందుకు ఓ ఛాన్స్ వచ్చిందట. 

శాండల్‌వుడ్ వర్గాల సమాచారం మేరకు.. క‌న్న‌డ రాకింగ్‌స్టార్ య‌ష్ హీరోగా న‌ర్త‌న్ ద‌ర్శ‌క‌త్వంలో ఓ సినిమా తెర‌కెక్క‌నుంద‌ట‌. పాన్ ఇండియా లెవ‌ల్లో తెర‌కెక్క‌బోయే ఈ సినిమాలో హీరోయిన్‌గా త‌మ‌న్నా పేరును పరిశీలిస్తున్నారట. అయితే, దీనికి ఈ మిల్కీ బ్యూటీ సమ్మతించాల్సివుంటుంది.