'ఊహలు గుసగుసలాడే' అనే చిత్రంతో తెలుగు వెండితెరకు పరిచయమైన హీరోయిన్ రాశీఖన్నా. ఆ తర్వాత 2014లో వచ్చిన 'మనం' చిత్రంలో ఆమె కనిపించింది. అక్కడ నుంచి ఆమె సినీ కెరీర్ తిరుగులేకుండా సాగుతోంది. 'బెంగాల్ టైగర్', 'సుప్రీం' వంటి చిత్రాల్లో నటించిన ఈ అమ్మడు తెలుగులో చివరగా నటించిన చిత్రం 'వెంకీమామ'. ఈ చిత్రంతోపాటు 'శ్రీనివాస కళ్యాణం', 'ప్రతి రోజూ పండగే' వంటి చిత్రాల విజయాన్ని తన ఖాతాలో వేసుకుంది.
ప్రస్తుతం లాక్‌డౌన్ కారణంగా ఆమె ఇంటికే పరిమితమైంది. పెరట్లో పూల చెట్లను పెంచుతూ కనిపిస్తోంది. అదేసమయంలో టిట్టర్‌లో తన అభిమానులు సంధించే ప్రశ్నలకు సమాధానం చెపుతోంది.
ఈ సందర్భంగా అభిమానులు అడిగిన ప్రశ్నలకు స్పందిస్తూ, 'ప్రస్తుతం ఇంటి దగ్గర మంచి పుస్తకాలు చదువుతూ కాలక్షేపం చేస్తున్నాను. నేను ఎప్పుడూ ఆనందంగా ఉండటానికి కారణం నా కుటుంబ సభ్యులు .. స్నేహితులే. ప్రతి విషయాన్ని పాజిటివ్‌గా తీసుకోవడం మరో కారణం.
తెలుగులో నేను అభిమానించే కథానాయిక సమంత. తెలుగు హీరోల్లో మహేశ్ బాబు .. అల్లు అర్జున్‌లతో నటించాలని వుంది. అలాంటి అవకాశం కోసమే ఎదురుచూస్తున్నాను. ముఖ్యంగా, అల్లు అర్జున్ మంచి అనుభవమున్న హీరో.
అలాగే, నేచురల్ స్టార్ నాని ఓ మంచి వ్యక్తి. ఇలాంటివారితో నటించాలని వుంది. ఇక పెళ్లిపై నాకంటూ కొన్ని అభిప్రాయాలు వున్నాయి. లవ్ మ్యారేజ్ చేసుకునే అవకాశాలే ఎక్కువ' అంటూ ఈ ఢిల్లీ భామ చెప్పుకొచ్చింది.