ఫేక్ ఇన్‌స్టాగ్రాం క్రియేట్ చేసి దాని ద్వారా ఓ యువతిని వేధింపులకు గురిచేసాడు యువకుడు. ఆమె తన అభ్యర్థనను వ్యతిరేకించినందుకు ఓ ఫేక్ ఇన్‌స్టాగ్రాం క్రియేట్ చేసి అందులో అసభ్య పదజాలంతో ఆమెను వేధించడమే కాకుండా ఆమె ఫోన్ నెంబరును ఓ పోర్న్ సైటులో పెట్టాడు. దీనితో బాధితురాలు పోలీసులకి ఫిర్యాదు చేయడంతో రాచకొండ సైబర్ క్రైం పోలీసులు అతడిని అరెస్టు చేశారు.
వివరాలు చూస్తే... నిందితుడు 19 ఏళ్ల సాయి మాధవ్, బాధితురాలు ఒకే ట్యూషన్లో చదువుతున్నారు. ఆమెను ఇన్‌స్టాగ్రాంలో చూసిన యువకుడు ఆమెకి ఫ్రెండ్ రిక్వెస్ట్ ఇచ్చాడు. ఆమె దానిని యాక్సెప్ట్ చేయడంతో చాటింగ్ చేయడం ప్రారంభించాడు.
కొన్ని రోజుల్లోనే అతడి ప్రవర్తన నచ్చకపోవడంతో అతడిని బ్లాక్ చేసింది. దీనితో అతడు మరో ఖాతా క్రియేట్ చేసి ఆమెను వేధించడం మొదలుపెట్టాడు. దాన్ని కూడా ఆమె బ్లాక్ చేయడంతో ఆమె ఫోన్ నెంబరును పోర్న్ సైటులో పెట్టి కాల్ గర్ల్ అంటూ ట్యాగ్ చేసాడు. దీనిపై బాధితురాలు పోలీసులకు ఫిర్యాదు చేయడంతో అతడిని జూలై 29న అరెస్టు చేశారు.