పర్యావరణ మార్పుల కారణంగా భూతాపం పెరిగిపోతోంది. ముఖ్యంగా, ఉష్ణోగ్రతలు విపరీతంగా పెరిగిపోతున్నాయి. ఎండ వేడిమి తట్టుకోలేక పోతున్నారు. ఈ ఎండల వేడిమి నుంచి తప్పించుకునేందుకు కూల్ రూఫ్ టాప్‌ టెక్నాలజీ ఎంతగానో ఉపయోగపడుతుందని తెలంగాణ రాష్ట్ర మంత్రి కేటీఆర్ చెప్పారు. తెలంగాణ రాష్ట్రంలో మన నంగరం అనే కార్యక్రమాన్ని ప్రారంభించబోతున్నట్టు తెలిపారు. ఈ క్రమంలో తెలంగాణ కూల్ రూఫ్ పాలసీ 2023-28 ప్రారంభోత్సవ కార్యక్రమంలో ఆయన పాల్గొన్నారు.
ఈ సందర్భంగా ఆయన మాట్లాడుతూ.. ఉష్ణోగ్రతలు పెరిగిపోవడంతో గృహాలు, ఆఫీసులు, వాణిజ్య భవనాలలో కరెంట్ వాడకం పెరిగిపోతుందని చెప్పారు. దీంతో కరెంట్ బిల్లు భారీగా వస్తుందని వివరించారు. ఈ ప్రభావాన్ని తగ్గించుకునేందుకు కూల్ రూఫ్ పాలసీని ప్రభుత్వం తీసుకొచ్చిందని తెలిపారు. ఈ విధానం భవిష్యత్ తరాలకు కూడా ఉపయోగపడుతుందని చెప్పారు.
కూల్ రూఫ్ వల్ల మీటర్‌కు కేవలం రూ.300 మాత్రమే ఖర్చు అవుతుందన్నారు. దీనివల్ల కరెంట్ వాడకం తగ్గి ఆ మెరకు బిల్లు కూడా తగ్గుతుందని చెప్పారు. కూల్ రూఫ్‌కు పెట్టిన పెట్టుబడి తిరిగి వస్తుందని ఆయన వివరించారు. కూల్ రూఫ్ కోసం ముందుకు వచ్చే వారికి ప్రభుత్వం తరపున ప్రత్యేక శిక్షణ కూడా ఇస్తామని మంత్రి కేటీఆర్ తెలిపారు.