వీకెండ్ వస్తే చాలు పీకల దాగా తాగి డ్రైవ్ చేసే మందుబాబుల ఆగడాలకు అదుపులేకుండా పోతుంది. పబ్బుల్లో ఫుల్లుగా తాగి గర్ల్ ఫ్రెండ్స్‌తో కలిసి కారెక్కి ర్యాష్ డ్రైవ్ చేస్తూ రెచ్చిపోతున్నారు యువకులు. డ్రంకన్ డ్రైవ్ చిత్రీకరిస్తున్న మీడియాపై యువతీ యువకులు చిందులు తొక్కి హల్చల్ చేస్తున్నారు.
తాజాగా మాదాపూర్ పోలీస్‌స్టేషన్‌ పరిధిలో శుక్రవారం అర్థరాత్రి నండూరి కిరణ్‌ రెడ్డి, అను గుప్తాలు పూటుగా మద్యం సేవించి అనంతరం వేగంగా కారు నడుపుతూ మరో వాహనాన్ని ఢీకొట్టారు. దీంతో పలువురు గాయపడ్డారు. వెంటనే స్థానికులు పోలీసులకు ఫిర్యాదు చేశారు. కేసు నమోదు చేసుకున్న మాదాపూర్ పోలీసులు కిరణ్‌ రెడ్డి, అను గుప్తాలను అదుపులోకి తీసుకుని పోలీస్‌స్టేషన్‌కు తరలించారు.
ఇద్దరిని పోలీసులు విచారిస్తున్న సమయంలో పోలీస్ స్టేషన్‌లోని వస్తువులను పగులగొట్టి హంగామా సృష్టించారు. పోలీస్ స్టేషన్‌లో వీరి ఆగడాలను చిత్రీకరిస్తున్న రిపోర్టర్ల మీద కూడా తమ ప్రతాపం చూపించారు. గతంలో కూడా నండూరి కిరణ్‌ రెడ్డిపై కేసులు ఉన్నాయని, జూబ్లీహిల్స్‌లో పీడీయాక్ట్ నమోదు చేసినట్లు మాదాపూర్ పోలీసులు తెలిపారు.