ఆ మార్గంలో 78 రైళ్లను రద్దు చేసిన దక్షిణ మధ్య రైల్వే!!

దక్షిణ మధ్య రైల్వే పరిధిలో మరోమారు అనేక రైళ్ళు రద్దు అయ్యాయి. కాజీపేట - బల్లార్ష సెక్షన్‌లో ఇంజనీరింగ్ పనుల మరమ్మతుల నిమిత్తం ఈ నిర్ణయం తీసుకున్నారు. దీంతో ఈ మార్గంలో ఏకంగా 78 రైళ్ళను రద్దు చేస్తూ రైల్వే అధికారులు నిర్ణయం తీసుకున్నారు. ఈ మార్గంలో ఇంజనీరింగ్ పనులతో పాటు ఆసిఫాబాద్ - రేచ్ని స్టేషన్ల మధ్య మూడో లైను నిర్మాణం కారణంగా వివిధ రోజుల్లో మొత్తం 78 రైళ్ళను రద్దు చేశారు. 26 ఎక్స్‌‍ప్రెస్‌లను దారి మళ్లించారు. వాటి వివరాలను దక్షిణ మధ్య రైల్వే ఓ పత్రికా ప్రకటనలో తెలిపింది. ఈ రైళ్లు కనిష్టంగా ఒక్క రోజు గరిష్టంగా 11 రోజుల పాటు రద్దు కానున్నాయి. 

సికింద్రాబాద్‌ - సిర్పూర్‌ కాగజ్‌నగర్‌ల మధ్య తిరిగే కాగజ్‌నగర్‌ ఎక్స్‌ప్రెస్‌ రైళ్లు (నం.12757/12758) జూన్‌ 26 నుంచి జులై 6 వరకు రద్దయ్యాయి. పుణె - కాజీపేట ఎక్స్‌ప్రెస్‌ (నం.22151) ఈ నెల 28, జులై 5న.. కాజీపేట - పుణె ఎక్స్‌ప్రెస్‌ (నం.22152) జూన్‌ 30, జులై 7న.. హైదరాబాద్‌ - గోరఖ్‌పూర్‌ (నం.02575) జూన్‌ 28న, గోరఖ్‌పూర్‌ - హైదరాబాద్‌ (నం.02576) ఎక్స్‌ప్రెస్‌ జులై 30న రద్దయ్యాయి.

అలాగే, ముజఫర్‌పూర్‌ - సికింద్రాబాద్‌ (నం.05293) జులై 2న, సికింద్రాబాద్‌ - ముజఫర్‌పూర్‌ (నం.05294) జూన్‌ 27, జులై 4న.. గోరఖ్‌పూర్‌ - జడ్చర్ల (నం.05303) రైలు జూన్‌ 29న, జడ్చర్ల - గోరఖ్‌పూర్‌ (నం.05304) రైళ్లు జులై 1న రద్దయ్యాయి.   

సికింద్రాబాద్‌ - రాక్సల్‌ మధ్య తిరిగే వేర్వేరు మూడు రైళ్లు జూన్‌ 26, 27, 28 తేదీల్లో.. సికింద్రాబాద్‌ - దానాపుర్‌ల మధ్య తిరిగే వేర్వేరు ఆరు రైళ్లు జూన్‌ 27, 28, 29, జులై 1 తేదీల్లో.. సికింద్రాబాద్‌ - సుభేదార్‌గంజ్‌ మధ్య తిరిగే రైళ్లు జూన్‌ 27, 29 తేదీల్లో రద్దయ్యాయి.

అదేవిధంగా తెలంగాణ, దురంతో ఎక్స్‌ప్రెస్‌లను నిర్ణీత తేదీల్లో దారి మళ్లించి నడిపించాలని దక్షిణ మధ్య రైల్వే నిర్ణయించింది. కాజీపేట మీదుగా వెళ్లే సికింద్రాబాద్‌ - న్యూఢిల్లీ (నం.12723) తెలంగాణ ఎక్స్‌ప్రెస్‌ను జులై 4, 5, 6 తేదీల్లో నిజామాబాద్, ముద్కేడ్‌ మీదుగా మళ్లించనున్నారు. కాజీపేట, రామగుండం, మంచిర్యాల, బెల్లంపల్లి స్టేషన్లను ప్రయాణమార్గం నుంచి తొలగించారు. 

న్యూఢిల్లీ - సికింద్రాబాద్‌ (నం.12724) తెలంగాణ ఎక్స్‌ప్రెస్‌ను జులై 3, 4, 5 తేదీల్లో ముద్కేడ్, నిజామాబాద్‌ మీదుగా నడిపిస్తారు. బెల్లంపల్లి, మంచిర్యాల, రామగుండం, కాజీపేట స్టేషన్లను ప్రయాణమార్గం నుంచి తొలగించారు. సికింద్రాబాద్‌ - నిజాముద్దీన్‌ (ఢిల్లీ), నిజాముద్దీన్‌ - సికింద్రాబాద్‌ దురంతో ఎక్స్‌ప్రెస్‌ రైళ్లను (నం.12285/12286) జులై 4, 5 తేదీల్లో నిజామాబాద్‌ మీదుగా దారి మళ్లించి నడిపిస్తారు.