జంట నగరాల్లోని మందు బాబులకు సర్కారు చేదువార్త చెప్పింది. హోళీ పండుగను పురస్కరించుకుని జంట నగరాల్లోని అన్ని వైన్ షాపులు మూతపడనున్నాయి. బార్ అండ్ రెస్టారెంట్లు, కల్లు దుకాణాలు మూతపడనున్నాయి. ఈ మేరకు పోలీసులు ఆదేశాలు జారీచేశారు. హోలీ సందర్భంగా హైదరాబాద్, సైబరాబాద్‌తో పాటు రాచకొండ పోలీస్ స్టేషన్ పరిధిలోని మద్యం అమ్మకాలు జరగకుండా వైన్స్ షాపులు మూసివేయాలని పోలీసులు ఆదేశించారు. అయితే, నక్షత్ర హోటళ్లు, రిసార్ట్స్‌లకు మాత్రం ఈ ఆదేశాలు వర్తింవచని పేర్కొన్నార. ఈ మేరకు హైదరాబాద్, సైబరాబాద్, రాచకొండ పోలీస్ కమిషనర్లు ఆదేశాలు జారీ చేశారు.
ఇందులోభాగంగా, ఈ నెల 25వ తేదీన ఉదయం 6 గంటల నుంచి 26వ తేదీ ఉదయం 6 గంటల వరకు ఈ ఆదేశాలు అమల్లో ఉంటాయని పేర్కొన్నారు. హోలీ వేడుకల్లో ఎటువంటి అంవాఛనీయ సంఘటనలు చోటు చేసుకోకుండా ఉండేందుకు వీలుగా, ఇతరులకు ఇబ్బందులు లేకుండా చూసే ముందు జాగ్రత్త చర్యల్లో భాగంగానే ఈ నిర్ణయం తీసుకున్నట్టు పోలీసుు పేర్కొన్నారు. అలాగే, హోళీ సంబరాల్లో భాగంగా, రోడ్లపై ఇష్టారీతిన వేడుకలు జరుపుకుంటూ వచ్చీపోయే వారికి ఇబ్బంది కలిగిస్తే మాత్రం కఠిన చర్యలు తీసుకుంటామని తెలిపారు. అలాగే, వాహనాల్లో గుంపులుగా వచ్చి ప్రయాణించవద్దని సూచించారు.