ఏపీ నుంచి పోటీ చేయాలనేది నా కోరిక.. జయప్రద

బీజేపీ సీనియర్ నేత, మాజీ ఎంపీ, నటి జయప్రద ఇటీవల ఆంధ్రప్రదేశ్ (ఏపీ) నుంచి ఎన్నికల్లో పోటీ చేయాలనుకుంటున్నట్లు వెల్లడించారు. ఏపీ నుంచి పోటీ చేయాలనేది నా కోరిక అని, అయితే అంతా పార్టీ నిర్ణయంపైనే ఆధారపడి ఉంటుందని జయప్రద అన్నారు. 

అంతేకాకుండా, స్టార్ క్యాంపెయినర్‌గా ఎన్డీయే అభ్యర్థులకు ప్రచారం చేసేందుకు జయప్రద సుముఖత వ్యక్తం చేశారు. తన పుట్టినరోజు సందర్భంగా తిరుమలకు వచ్చిన సందర్భంగా ఆమె మీడియాతో ఈ విషయాలను పంచుకున్నారు.

అయితే ఏపీ నుంచి జయప్రద బరిలోకి దిగే అవకాశాలు చాలా తక్కువగా ఉన్నాయని విశ్లేషకులు అంచనా వేస్తున్నారు. ప్రస్తుతం ఏపీలో టీడీపీ, జనసేనతో బీజేపీ పొత్తు పెట్టుకుంది. త్వరలో జరగనున్న అసెంబ్లీ, పార్లమెంట్ ఎన్నికల్లో పోటీ చేసే అభ్యర్థులను కూటమి ఇప్పటికే ప్రకటించింది. 

పొత్తులో భాగంగా 6 లోక్‌సభ, 10 అసెంబ్లీ స్థానాల్లో బీజేపీ, 144 అసెంబ్లీ, 17 లోక్‌సభ స్థానాల్లో టీడీపీ అభ్యర్థులు పోటీ చేయనున్నారు. జనసేన 2 లోక్‌సభ, 21 అసెంబ్లీ స్థానాల్లో తమ అభ్యర్థులను నిలబెట్టింది. మే 13న ఒకేసారి లోక్‌సభ, అసెంబ్లీ ఎన్నికలు జరగనుండగా, జూన్ 4న ఫలితాలు వెలువడనున్నాయి.

కాగా, జనసేన, బీజేపీల సహకారంతో తమ పార్టీ బలమైన కూటమిని ఏర్పాటు చేసినట్లు టీడీపీ అధినేత చంద్రబాబు నాయుడు బుధవారం ప్రకటించారు. వైఎస్సార్‌సీపీ దుశ్చర్యలను ఎదుర్కొని రాష్ట్రంలో విజయం సాధిస్తామని ఆయన ధీమా వ్యక్తం చేశారు.