ప్రముఖ మ్యూజిక్ యాప్ గూగుల్ ప్లే మ్యూజిక్ ఇక కనుమరుగు కానుంది. దీన్ని శాశ్వతంగా మూసివేయాలని గూగుల్ నిర్ణయించింది. తొలుత ఆస్ట్రేలియా, న్యూజిలాండ్‌లో ఈ సెప్టెంబర్‌ నుంచి.. మిగిలిన దేశాల్లో అక్టోబర్‌ నుంచి ఈ యాప్ ఇక పనిచేయదు. డిసెంబర్‌ తర్వాత ఇందులో డేటా మొత్తం తుడిచిపెట్టుకుపోతుందని గూగుల్ ఓ ప్రకటనలో తెలిపింది.
ప్రస్తుతం గూగుల్‌కు చెందిన గూగుల్ ప్లే మ్యూజిక్, యూట్యూబ్ మ్యూజిక్ రెండూ ఒకేరకమైన సేవలందిస్తున్నాయి. ఈ నేపథ్యంలో ఒకే తరహా యాప్‌లు రెండు అవసరం లేదని భావించిన గూగుల్.. గూగుల్ ప్లే మ్యూజిక్‌కు స్వస్తి చెప్పాలని నిర్ణయించింది.
ఇందులో భాగంగా గూగుల్ ప్లే మ్యూజిక్‌లో ఉన్న కంటెంట్‌ను యూట్యూబ్ మ్యూజిక్‌కు మార్చుకునేందుకు యూజర్లకు వీలు కల్పించింది. ఇందుకోసం యూట్యూబ్ మ్యూజిక్‌లో ఓ కొత్త బటన్ ఏర్పాటు చేసింది. యూజర్లు తమ డేటా కోల్పోకుండా ఉండేందుకు ఈ సదుపాయం కల్పించినట్లు గూగుల్ తెలిపింది.