ఢిల్లీకి సమీపంలోని నోయిడాలో ఓ పెళ్లి కుమారుడు డ్రైనేజీలో పడిపోయాడు. బరాత్‌లో డ్యాన్స్ చేస్తుండగా అపశృతి చోటుచేసుకుంది. నోయిడాలోని సెక్టార్ 52లో ఉన్న హోషియార్‌పూర్‌లో ఈనెల 9వ తేదీన ఓ పెళ్లి వేడుక జరిగింది. ఈ వేడుక కోసం ఫంక్షన్ హాల్‌ను బుక్ చేసింది. బరాత్ కోసం తగిన ఏర్పాట్లు చేశారు.
పెళ్లికొడుకుని మండపం వరకు తీసుకువస్తున్నారు. బాజా భజంత్రీలు, పెళ్లికొడుకు, అతని ఫ్రెండ్స్, బంధువులు అందరూ బీభత్సంగా డ్యాన్స్‌లు చేస్తున్నారు. అయితే, పెళ్లి మండపానికి, రోడ్డుకి మధ్య ఓ చిన్న మురుగుకాలువ ఉంది. ఆ కాలువ మీద నుంచి రావడానికి చిన్న బ్రిడ్జి లాంటిది ఏర్పాటు చేశారు. తాత్కాలికంగా ఏర్పాటు చేసిన ఆ బ్రిడ్జి మీద బీభత్సమైన డ్యాన్స్‌లు చేయడంతో అది ఒక్కసారిగా కుప్పకూలింది. దీంతో పెళ్లికొడుకు సహా 15 మంది ఆ డ్రైనేజీలో పడిపోయారు.
పెళ్లికొడుక్కి ఘనస్వాగతం పలికేందుకు ఆ చిన్న బ్రిడ్జికి అవతలి వైపు పెళ్లికుమార్తె తల్లిదండ్రులు ఎదురుచూస్తున్నారు. పెళ్లికొడుకు తరపు వారి జోష్ చూసి వారు కూడా ఆనందంగానే ఉన్నారు. అయితే, వారి కళ్లముందే కాబోయే అల్లుడు అలా మురికి కాలువలో పడిపోయేసరికి వారు కూడా షాక్‌కి గురయ్యారు.