ఢిల్లీ తదుపరి ముఖ్యమంత్రి పదవికి రేఖ గుప్తాను ఎంపిక చేయడం ద్వారా బిజెపి హైకమాండ్ ఆ ఊహాగానాలకు తెరపడింది. ఇటీవలి అసెంబ్లీ ఎన్నికల్లో షాలిమార్ బాగ్ నియోజకవర్గం నుండి గెలిచిన రేఖ గుప్తా గతంలో బిజెపి రాష్ట్ర కార్యదర్శిగా పనిచేశారు. ఆమె ప్రతిష్టాత్మక ఢిల్లీ విశ్వవిద్యాలయంలో తన విద్యను పూర్తి చేశారు.
ఆప్ నాయకుడు అరవింద్ కేజ్రీవాల్‌ను ఓడించిన పర్వేష్ వర్మ ముఖ్యమంత్రి పదవికి ముందు వరుసలో ఉన్నారని నివేదికలు వచ్చాయి. అయితే, అనూహ్యంగా బీజేపీ నాయకత్వం రేఖ గుప్తాను ఎంచుకుంది. బుధవారం జరిగిన ఢిల్లీ బిజెపి శాసనసభా పక్ష సమావేశంలో ఈ నిర్ణయం ఏకగ్రీవంగా తీసుకోవడం జరిగింది.
కేజ్రీవాల్‌ను ఓడించి రాజకీయంగా సంచలనం సృష్టించిన పర్వేష్ వర్మను ఉప ముఖ్యమంత్రిగా నియమించారు. అదనంగా, విజేందర్ గుప్తా ఢిల్లీ అసెంబ్లీ స్పీకర్‌గా నియమితులయ్యారు. ముఖ్యమంత్రితో పాటు ఆరుగురు కేబినెట్ మంత్రులు కూడా ప్రమాణ స్వీకారం చేయనున్నారు.
27 సంవత్సరాల విరామం తర్వాత ఢిల్లీ అసెంబ్లీలో బిజెపి తిరిగి అధికారంలోకి రానుంది. ప్రమాణ స్వీకార కార్యక్రమం గురువారం మధ్యాహ్నం 12:35 గంటలకు అట్టహాసంగా జరుగనుంది.