ముంబైలోని ఓ నక్షత్ర హోటల్‌లో బస చేసిన కెనడా దేశానికి చెందిన ఓ మహిళపై హోటల్ సిబ్బందే లైంగికదాడికి పాల్పడ్డాడు. సెల్ఫీ దిగుతానంటూ ఆమె గదిలోకి వెళ్ళిన సిబ్బంది... ఆమెను గట్టిగా వాటేసుకుని లైంగికదాడికి పాల్పడ్డాడు. ఈ ఘటనతో నిర్ఘాంతపోయిన ఆ మహిళ బిగ్గరగా కేకలు వేయడంతో ఇతర సిబ్బంది అక్కడకు చేరుకుని ఆమెను రక్షించారు. తాజాగా వెలుగులోకి వచ్చిన ఈ వివరాలను పరిశీలిస్తే,
కెనడా ఫిల్మ్ ఇండస్ట్రీకి చెందిన 29 యేళ్ళ మహిళ ఒకరు తన వ్యక్తిగత పనుల మీద ముంబైకు వచ్చి ఓ స్టార్ హోటల్‌లో బసచేసింది. తొలుత తన వ్యాపారపనిమీద బయటకు వెళ్లి వచ్చింది. ఆ తర్వాత మళ్లీ బయటకు వెళ్లేందుకు సిద్ధమవుతున్నది. ఆ సమయంలో మహిళ బస చేసిన గది వద్దకు హోటల్‌లో పని చేసే సుమిత్ రావు అనే ఉద్యోగి వచ్చి బెల్ కొట్టాడు. దీంతో ఆమె తలుపు తీయడంతో సెల్ఫీ దిగుతానంటూ కోరడంతో ఆమె సమ్మతించింది.
దీంతో గదిలోకి వెళ్లిన సుమిత్ రావు... సెల్ఫీ కోసం ఆమె పక్కకు వెళ్లి గట్టిగా వాటేసుకుని పిచ్చిపచ్చి పనులు చేశాడు. అతని చర్యలతో నిర్ఘాంత పోయిన ఆ మహిళ... కేకలు వేయడంతో ఇతర సిబ్బంది వచ్చి ఆమెను రక్షించారు. ఆ తర్వాత హోటల్ గదిని ఖాళీ చేసి నేరుగా పోలీసు స్టేషన్‌కు వెళ్లి ఫిర్యాదు చేసింది. దీనిపై పోలీసులు కేసు నమోదు చేసి విచారణ జరుపుతున్నారు.