ప్రధానమంత్రి నరేంద్ర మోదీ అమెరికా పర్యటనపై భారత్ గంపెడాశలు పెట్టుకుంది. ఈ పర్యటన తో మన దేశానికి ఎన్నో ప్రయోజనాలు కలుగుతాయని విశ్లేషకులు అంచనా వేస్తున్నారు. ఈ నెల 21న ప్రధాని మోదీ అమెరికా పర్యటనకు బయలుదేరనున్నారు. 27 వరకు సాగనున్న ఈ పర్యటనలో.. 'హౌదీ మోదీ' సహా వివిధ కార్యక్రమాల్లో పాల్గొంటారు ప్రధాని.
అగ్రరాజ్య అధ్యక్షుడు ట్రంప్తో భేటీ కానున్నారు. మోదీ పర్యటన వివరాలపై అంతర్జాతీయ వ్యవహారాల నిపుణులు స్మితా శర్మ సమగ్ర విశ్లేషణ.. అమెరికా అధ్యక్షుడు డొనాల్డ్ ట్రంప్తో వేదిక పంచుకోవడం, చమురు కంపెనీలతో చర్చ, ఐక్యరాజ్యసమితి ప్రధాన కార్యదర్శి నేతృత్వంలో జరిగే వాతావరణ మార్పులో విధానాలపై ప్రసంగం, సాధారణసభలో కీలక ప్రసంగం సహా ప్రధానమంత్రి నరేంద్ర మోదీ అమెరికా పర్యటన బిజీబిజీగా గడవనుంది.
పాకిస్థాన్తో ఉద్రిక్తతల నేపథ్యంలో 20 దేశాలతో ద్వైపాక్షిక చర్చలు జరపనున్నారు మోదీ. శుక్రవారం అమెరికా వెళ్లిన మోదీ హ్యూస్టన్, న్యూయార్క్ల్లో నగరాల్లో ప్యాకేజీ అజెండా ఆయన కోసం వేచిచూస్తోంది. ప్రపంచ చమురు దిగ్గజాలైన ఎక్జాన్ మొబైల్, బీపీ వంటి సంస్థలతో మోదీ శనివారం భేటీ కానున్నారు.
జిన్పింగ్ తో భేటీ
మరికొద్ది వారాల్లో భారత్-చైనా అగ్రనేతలు నరేంద్రమోదీ, షి జిన్పింగ్ భేటీ కానున్నారు. జమ్ముకశ్మీర్ స్వయంప్రతిపత్తి రద్దు నేపథ్యంలో పాకిస్థాన్ అనుకూలంగా మాట్లాడిన డ్రాగన్ దేశం.. ఈ సదస్సులో ఏ వైఖరి అవలంబించనుందనే దానిపై సర్వత్రా ఆసక్తి నెలకొంది.
ఇప్పటివరకూ ఇలా ఎన్నో అడుగులు వేసినప్పటికీ భారత్, చైనాల మధ్య నెలకొన్న అపనమ్మకాలు.. అతికష్టం మీద తీరే అవకాశాలు ప్రస్తుతం కన్పిస్తున్నాయి. గతేడాది జరిగిన వుహాన్ సదస్సు ఇచ్చిన ఉత్సాహంతో చైనా అధ్యక్షుడు షి జిన్పింగ్ను అనధికారిక పర్యటన కోసం అక్టోబర్లో భారత్కు రావాలని ఆహ్వానించారు ప్రధానమంత్రి నరేంద్రమోదీ.
షాంఘై సహకార సంస్థ(ఎస్సీఓ), జపాన్లో జరిగిన జీ-20 దేశాల సదస్సు వేదికగా ఇప్పటికే ఇరునేతలు ఈ ఏడాదిలో రెండు సార్లు భేటీ అయ్యారు. ఇదిలా ఉంటే.. ఇరునేతల భేటీకి సన్నాహాలు జరుగుతున్న వేళ చైనా టెక్ దిగ్గజం హువావే 5జీ నెట్వర్క్కు భద్రతా అనుమతులు ఇవ్వకూడదని భారత్పై ఒత్తిడి తెస్తోంది అగ్రరాజ్యం అమెరికా.
సమగ్ర ప్రాంతీయ ఆర్థిక సహకారం(ఆర్సీఈపీ)పై చైనాతో ఆసియాన్ దేశాల విముఖత, వుహాన్లో అవగాహనకు వచ్చిన బీసీఐఎమ్(బంగ్లాదేశ్, చైనా, భారత్, మయన్మార్) ఆర్థిక నడవా, జపాన్ పెట్టుబడుల ప్రోత్సాహం కోసం.. ఈశాన్య దేశాల సహకారం నుంచి చైనాను దూరంగా ఉంచడం వంటి అంశాలు ప్రధానంగా చర్చకు రానున్నాయి.