భారతీయ జనతా పార్టీ సారథ్యంలోని ఎన్డీయే కూటమికి కాంగ్రెస్ నేత రాహుల్ గాంధీ కొత్త నిర్వచనం చెప్పారు. ఎన్డీయే అంటే నేషనల్ డెమొక్రటిక్ అలయెన్స్ కాదనీ, ఎన్డీయే అంటే నో డేటా అవైలబుల్ అని ఎద్దేవా చేశారు. ఈ మేరకు ఆయన శనివారం ఓ ట్వీట్ చేశారు.
వివిధ సందర్భాల్లో తమ వద్ద తగిన డేటా లేదంటూ కేంద్రం సమాధానం ఇవ్వడంపై ఆయన ఈ విధంగా సెటైర్లు వేశారు. ఈ ప్రభుత్వం వద్ద డేటానే కాదు.. జవాబుదారీతనం కూడా లేదని విమర్శలు గుప్పించారు. ఈ సందర్భంగా ఎన్డీయే అనే పదానికి తనదైన నిర్వచనం ఇచ్చారు.
ఆక్సిజన్‌ కొరత కారణంగా చనిపోవడం గానీ, వ్యవసాయ చట్టాలకు వ్యతిరేకంగా జరిగిన ఆందోళనలో ఎవరూ చనిపోవడం గానీ జరగలేదన్న విషయం ప్రజలు నమ్మాలని ఈ ప్రభుత్వం కోరుకుంటోందని రాహుల్ గాంధీ అన్నారు.
మూకదాడులు, జర్నలిస్టుల అరెస్టుల వంటి వాటిపైనా ప్రభుత్వం మౌనంగా ఉండడాన్ని తప్పుబట్టారు. ఈ ప్రభుత్వం వద్ద డేటా లేదు.. సమాధానం లేదు.. జవాబుదారీతనం అసలే లేదని ట్వీట్‌చేశారు.
కొవిడ్‌ లాక్డౌన్‌ సమయంలో నడకదారిన వెళ్లిన చాలా మంది మరణించారు. దీనిపై కేంద్రం అప్పట్లో తమ వద్ద అలాంటి డేటా ఏదీ లేదని పేర్కొంది. రెండో వేవ్‌ సందర్భంగా ఆక్సిజన్‌ కొరతతో అనేక మంది ప్రాణాలు కోల్పోయినప్పుడు కూడా ఎవరూ తమ వద్ద ఆ డేటా లేదని కేంద్రం సమాధానం ఇచ్చింది. ఇలా పలు సందర్భాల్లో కేంద్రం తమ వద్ద డేటా లేదని సమాధానం ఇవ్వడంపై రాహుల్ ఈ విధంగా స్పందించారు.