బిహార్ రాష్ట్రంలో ఓ విచిత్ర ఘటన జరిగింది. ఓ వివాహిత తన ప్రియుడితో ఏకాంతంగా ఉన్న సమయంలో కట్టుకున్న భర్త కుటుంబ సభ్యులకు రెడ్‌హ్యాండెడ్‌గా పట్టుబడింది. దీంతో అతడిని కుటుంబ సభ్యులు చితకబాదారు. ఈ విషయం తెలుసుకున్న భర్త... తన భార్యను ఆమె ప్రియుడికిచ్చి వివాహం చేశాడు. తాజాగా వెలుగులోకి వచ్చిన ఈ వివరాలను పరిశీలిస్తే,
బీహార్ రాష్ట్రంలోని నవాడా జిల్లాకు చెందిన ఓ వివాహితకు అదేప్రాంతానికి చెందిన ఓ వ్యక్తితో అక్రమ సంబంధం ఏర్పడింది. ఇది చాలా కాలంగా సాగుతోంది. పైగా, అతడికి అప్పటికే వివాహమై ముగ్గురు పిల్లలు కూడా ఉన్నారు. కాగా, ప్రియుడు ఎప్పటిలాగే ఆమెను కలిసేందుకు ఇటీవల ఓ రాత్రి ఆమె ఇంటికి వెళ్లాడు. వాళ్లిద్దరూ ఏకాంతంగా ఉన్న సమయంలో భర్త కుటుంబ సభ్యులు రెడ్‌హ్యాండెడ్‌గా పట్టుకున్నారు. దీంతో వారు ప్రియుడిని బందీగా చేశారు. పైగా, అక్రమ సంబంధం పెట్టుకున్న జంట గ్రామం విడిచి వెళ్లాలంటూ గ్రామపెద్దలు ఆదేశించారు.
ఇంతలో వివాహిత భర్త ఇంటికి రావడంతో అసలు విషయం తెలిసింది. తన భార్య చేసిన పాడు పనికి ఏమాత్రం చింతించకుండా ఆమెకు తగిన విధంగా గుణపాఠం చెప్పాడు. తన భార్యకు, ఆమె ప్రియుడికి స్థానికంగా ఉండే గుడిలోనే పెళ్లి జరిపించాడు. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అయింది. ప్రియుడు వివాహిత నుదుటిపై కుంకుమ పెట్టే సమయంలో ఆమె వలవలా ఏడ్చేసింది. కాగా, దీనిపై ఎవరూ ఫిర్యాదు చేయకపోవడంతో పోలీసులు కూడా ఎలాంటి చర్యలు తీసుకోలేదు.