అత్యంత శక్తిమంతమైన పాస్‌పోర్టుల్లో భారత ర్యాంకు ఎంత?

ప్రపంచంలోనే అత్యంత శక్తిమంతమైన పాస్‌ పోర్టుల జాబితాలో భారత్ ర్యాంకు పతనమైంది. గత యేడాదితో పోల్చితే ఈ దఫా భారత్ పాస్‌పోర్టు ర్యాంకు ఒక ర్యాంకు పతనమై 84 నుంచి 85కు చేరింది. తాజాగా ప్రఖ్యాత హెన్రీ పాస్ పోర్టు ఇండెక్స్-2024 జాబితా వెల్లడైంది. ఇందులో భారత్ ర్యాంకు పడిపోయి కనిపించింది. 

ఎందుకంటే... గతేడాది భారత్ పాస్ పోర్టుతో 60 దేశాలకు వీసాతో పని లేకుండా వెళ్లే వీలుండేది. ఈ ఏడాది ఆ సంఖ్య 62 దేశాలకు పెరిగినప్పటికీ, ర్యాంకింగ్స్‌లో భారత స్థానం పతనమైంది. భారత పర్యాటకులు వీసా లేకుండానే రావొచ్చంటూ గత కొన్ని నెలల వ్యవధిలోనే ఇరాన్, మలేసియా, థాయ్‌లాండ్ దేశాలు కూడా ప్రకటించాయి. ఇక, హెన్రీ పాస్ పోర్ట్ ఇండెక్స్- 2024 జాబితాలో ఫ్రాన్స్ నెంబర్ వన్‌గా నిలిచింది. ఫ్రాన్స్ పాస్ పోర్టు ఉంటే 194 దేశాలకు వీసా లేకుండానే వెళ్లొచ్చు. ఈ జాబితాలో జర్మనీ, ఇటలీ, జపాన్, సింగపూర్, స్పెయిన్ కూడా పై వరుసలో ఉన్నాయి.

అదేసమయంలో, హెన్రీ పాస్ పోర్ట్ ఇండెక్స్ జాబితాలో పాకిస్థాన్ స్థానంలో ఎలాంటి మార్పు లేదు. గతేడాది పాకిస్థాన్ 106వ స్థానంలో ఉండగా, ఇప్పుడూ అదే స్థానంలో ఉంది. మరో పొరుగుదేశం బంగ్లాదేశ్ 101 నుంచి 102వ ర్యాంకుకు పడిపోయింది. ఆశ్చర్యకరమైన అంశం ఏమిటంటే... ఇటీవల భారతదేశంతో సై అంటే సై అంటున్న మాల్దీవులు హెన్రీ పాస్ పోర్టు జాబితాలో 58వ ర్యాంకులో కొనసాగుతోంది. మాల్దీవుల పాస్ పోర్టుతో 96 దేశాలకు వీసా లేకుండా నిరభ్యంతరంగా వెళ్లిరావొచ్చు.