గుజరాత్ రాష్ట్రంలో ర్యాగింగ్ భూతం బుసలుకొట్టింది. ఫలితంగా డాక్టర్ కావాలని ఎన్నో ఆశలతో కాలేజీలో అడుగుపెట్టిన ఓ వైద్య విద్యార్థి ప్రాణాలు కోల్పోయాడు. సీనియర్లు... ఆ జూనియర్ విద్యార్థిని ఏకంగా 3 గంటల పాటు ఎండలో నిలబెట్టడంతో స్పృహతప్పి పడిపోయాడు. ఆ తర్వాత ఆస్పత్రికి తరలించగా, చికిత్స పొందుతూ కన్నుమూశాడు. ఈ ఘటనకు సంబంధించిన 15 మంది సీనియర్ విద్యార్థులపై పోలీసులు కేసు నమోదు చేశారు. గుజరాత్ రాష్ట్రంలోని జీఎంఈఆర్ఎస్ వైద్య కాలేజీలో ఈ ఘటన చోటు చేసుకున్నట్టు జాతీయ మీడియా కథనాలు వెల్లడించాయి.
మృతి చెందిన విద్యార్థిని అనిల్ మెథానియగా గుర్తించారు. గుజరాత్ రాష్ట్రంలోని ధారపుర్ పాటన్ ప్రాంతంలోని వైద్య కాలేజీలో చేరాడు. పరియం పేరుతో ద్వితీయ సంవత్సర విద్యార్థులు ప్రెషర్లపై ర్యాగింగ్ చేశారు. ఈ క్రమంలో జూనియర్లను మూడు గంటల పాటు నిల్చోవాలని ఆదేశించారు. దీంతో అనిల్ స్పృహ కోల్పోయి కిందపడిపోయి అపస్మారక స్థితిలోకి జారుకున్నాడు. దీంతో ఆందోళన చెందిన సీనియర్లు ఆస్పత్రికి తరలించగా, చికిత్స పొందుతూ మృతి చెందాడు. కాగా, అనిల్ చనిపోయేముందు ఇచ్చిన వాంగ్మూలంలో సీనియర్లు బలవంతంగా నిల్చోబెట్టడం వల్లే ఇలా జరిగిందంటూ వారి పేర్లను వెల్లడించాడు. ఇపుడు వారందరిపై కేసులు నమోదు చేసి విచారణ జరుపుతున్నారు. మృతి తండ్రి ఫిర్యాదు మేరకు పోలీసులు కేసు నమోదు చేసి విచారణ జరుపుతున్నారు.