యువకుడిపై మొసలి దాడి: వీడియో వైరల్

యువకుడిపై మొసలి దాడికి సంబంధించిన వీడియో నెట్టింట వైరల్ అవుతోంది. మొసలి దాడిలో చివరకు ఆ వ్యక్తి ప్రాణాలు కోల్పోయాడు. ఈ ఘటన గుజరాత్‌లోని వడోదరలో చోటుచేసుకుంది. వివరాల్లోకి వెళితే.. పద్రా తాలూకాలోని సోఖ్దారఘు గ్రామానికి సమీపంలో ధధర్ నదిలో ఇమ్రాన్ దివాన్ (30) అనే వ్యక్తి స్నానానికి దిగాడు.

ఆ సమయంలో అతడిని ఓ మొసలి ఒక్కసారిగా నీళ్ళలోకి లాక్కువెళ్ళింది. ఆ తర్వాత అతడిపై మొసలి దాడి చేయడం ప్రారంభించింది. ఈ దృశ్యాలను స్థానికులు స్మార్ట్‌ఫోన్లలో తీశారు. 

అక్కడకు చేరుకున్న సహాయక సిబ్బంది నదిలో ఇమ్రాన్ దివాన్ కోసం వెతకడం ప్రారంభించారు. కొన్ని గంటల తర్వాత అతడి మృతదేహం నీళ్ళలో లభ్యమైందని అధికారులు మీడియాకు తెలిపారు.