భారతీయ జనతా పార్టీకి భారీ షాక్: బాబుల్ సుప్రియో బైబై

Babul Supriyo

పశ్చిమ బెంగాల్లో భారతీయ జనతా పార్టీకి భారీ షాక్ తగిలింది. ఆ పార్టీకి చెందిన కేంద్ర మాజీ మంత్రి, సిట్టింగ్ ఎంపీ అయిన బాబుల్ సుప్రియో బెంగాల్లోని అధికార తృణమూల్ కాంగ్రెస్ పార్టీలో చేరారు.

టీఎంసీ జాతీయ జనరల్ సెక్రటరీ అభిషేక్ బెనర్జీ, ఆ పార్టీ ఎంపీ డెరెక్ ఒబ్రెయిన్ సమక్షంలో ఆయన తృణమూల్ కండువా కప్పుకొన్నారు. బాబుల్ సుప్రియో మొన్నటి వరకు కేంద్రంలోని నరేంద్ర మోదీ మంత్రివర్గంలో ఉన్నారు. 

పశ్చిమ బెంగాల్లో బీజేపీ ఘోర పరాజయం తర్వాత జరిగిన కేంద్ర కేబినెట్ పునర్వ్యవస్థీకరణలో బాబుల్ సుప్రియోను కేంద్ర మంత్రివర్గం నుంచి తొలగించారు. ఆ తర్వాత నుంచి బాబుల్ సుప్రియో క్రియాశీల రాజకీయాలకు దూరంగా ఉన్నారు. 

ఓ సారి తాను రాజకీయాల నుంచి పూర్తిగా తప్పుకొంటున్నట్టు ట్వీట్ చేశారు. కానీ, కేంద్ర హోంమంత్రి అమిత్ షా నుంచి ఫోన్ రావడంతో ఆయన వెనక్కి తగ్గారు. తాను ఎంపీగా కొనసాగుతానని ప్రకటించారు. అయితే, ఇది జరిగిన కొన్ని రోజులకే బాబుల్ సుప్రియో అధికార టీఎంసీలో చేరారు.