దేశంలో మహిళలపై అకృత్యాలు పెచ్చరిల్లిపోతున్నాయి. గుజరాత్‌లోని రాజ్‌కోట్‌ జిల్లాలో దారుణం వెలుగు చూసింది. బాలికపై లైంగిక దాడి చేసిన యువకుడు స్నేహితుడి సాయంతో ఆ తతంగాన్ని వీడియో తీసి బెదిరించాడు. సోమ్‌నాథ్‌ జిల్లా కోడినార్‌‌లో ఈ ఘటన జరిగింది.
వివరాల్లోకి వెళితే.. మల్ష్రామ్‌ గ్రామానికి చెందిన హితేశ్‌ సోలంకి (22) అనే యువకుడు స్థానికంగా 16 ఏళ్ల బాలికను అపహరించి శివారులోని పొలాల్లోకి తీసుకెళ్లి లైంగిక దాడికి ఒడిగట్టాడు. వ్యవహారాన్ని తన స్నేహితుడు ప్రకాశ్‌ మొరాసియా సాయంతో వీడియో తీసి సోషల్‌ మీడియాలో పెడతానంటూ బాధితురాలిని బెదిరించాడు.
గత నెల 21న ఆమెను మరోమారు బెదిరించి శిథిలావస్థలోని ఓ ఇంటికి తీసుకెళ్లి అకృత్యానికి పాల్పడ్డాడు. బాలికకు వివరీతమైన కడుపు నొప్పి రావడంతో విషయం తల్లికి చెప్పింది. బాలిక తల్లి ఫిర్యాదు మేరకు కేసు నమోదు చేసి నిందితుడని అదుపులోకి తీసుకున్నామని కోడినార్‌ ఇన్‌స్పెక్టర్‌ తెలిపారు.