ట్విట్టర్ చార్జీల్లో డిస్కౌంట్ లేదా?.. జొమాటో ట్వీట్ నెట్టింట వైరల్

ట్విట్టర్ చార్జీల్లో డిస్కౌంట్ లేదా? అంటూ జొమాటో చేసిన ట్వీట్ ప్రస్తుతం సోషల్ మీడియాలో వైరల్ అవుతోంది. సోషల్ మీడియా ప్లాట్ ఫామ్ ట్విట్టర్ ఇటీవల బ్లూ టిక్ ఖాతాదారులకు నెలవారీ చార్జీలను పెంచేసిన సంగతి తెలిసిందే. 

ఈ వ్యవహారంపై ఆన్ లైన్ ఫుడ్ డెలివరీ, రెస్టారెంట్ బుకింగ్ సేవల సంస్థ జొమాటో ఆసక్తికరంగా స్పందించింది. "ఓకే ఎలాన్, 8 డాలర్లలో 60 శాతం తగ్గింపు ఇస్తే ఎలా ఉంటుంది..? 5 డాలర్ల వరకు?" అని ట్వీట్ చేసింది. దీనికి మస్క్ స్పందించలేదు కానీ, జొమాటో మంచి చర్చకు తెరతీసింది.

"TESLA లేదంటే doggy అనే కూపన్ కోడ్ అప్లయ్ చేయండి" అంటూ ఓ యూజర్ చమత్కారంగా కామెంట్ చేశాడు. జొమాటోలో డిస్కౌంట్ కూపన్ల మాదిరిగా ఈ సమాధానం ఇచ్చినట్టయింది. ఎలాన్ మస్క్ ట్విట్టర్ ను స్వేచ్ఛగా మాట్లాడే వేదికగా చేస్తానంటూ.. మాట్లాడేందుకు నెలకు 8 డాలర్లు అడుగుతున్నారని ఓ మహిళా యూజర్ పేర్కొంది.