క్రిస్ గేల్ అదుర్స్ రికార్డ్.. బౌండరీలతో 10వేల పరుగులు.. 1027 ఫోర్లు, 982 సిక్సులు

కరేబియన్ క్రికెట్ సునామి క్రిస్ గేల్ ఐపీఎల్‌లో అరుదైన రికార్డును తన ఖాతాలో వేసుకున్నాడు. అనారోగ్యం కారణంగా జనవరి నుంచి పిచ్‌లో అడుగుబెట్టని వెస్టిండీస్ వెటరన్ నేరుగా క్రీజులోకి దూకీ దూకడంతోనే పంజాబ్‌ను గెలిపించాడు. ఐపీఎల్ 2020లో యూనివర్సల్ బాస్ క్రిస్ గేల్ అద్భుతంగా ఎంట్రీ ఇచ్చాడు. ఆడిన తొలి మ్యాచ్‌లోనే హాఫ్ సెంచరీ బాదిన గేల్.. కింగ్స్ ఎలెవన్ పంజాబ్ విజయంలో కీలక పాత్ర పోషించాడు. 

ఫుడ్‌ పాయిజన్ కారణంగా ఈ సీజన్లో ఏడు మ్యాచ్‌లపాటు బెంచ్‌కే పరిమితమైన గేల్.. ఆర్సీబీపై బరిలో దిగి అభిమానులను అలరించాడు. జనవరి తర్వాత తొలిసారి బ్యాట్ పట్టిన గేల్.. ఈ మ్యాచ్‌లో 5 సిక్సర్లతో అభిమానులను క్రిస్ గేల్ అలరించాడు. టీ20ల్లో అరుదైన రికార్డ్‌ను క్రియేట్ చేశాడు. 13వేల 349 రన్స్‌తో.. టీ20ల్లో అత్యధిక పరుగులు చేసిన ఆటగాడిగా రికార్డు నెలకొల్పాడు. ఐపీఎల్‌లో 4500 పరుగులు సాధించిన ఆటగాడిగా అదరగొట్టాడు. 

కరేబియన్ క్రికెట్ దిగ్గజం బౌండరీల ద్వారానే పది వేల పరుగుల్ని పూర్తి చేయడం విశేషం. టీ20ల్లో గేల్ 1027 ఫోర్లు, 982 సిక్సులు బాదాడు. ప్రస్తుతం గేల్ కాకుండా కీరన్ పోలార్డ్, షోయబ్ మాలిక్ టీ20ల్లో పది వేలకుపైగా పరుగులు చేశారు.

ఇదిలా ఉంటే.. తాజాగా కింగ్స్‌ పంజాబ్‌ ఇన్నింగ్స్‌లో గేల్‌ తన అర్థసెంచరీ పూర్తి చేశాక ఒక సన్నివేశం చోటుచేసుకుంది. ఫిప్టీ పూర్తయిన తర్వాత బ్యాట్‌ పైకెత్తిన గేల్‌ బ్యాట్‌పై ఉన్న స్టిక్కర్‌ను చూపించాడు. ఆ స్టిక్కర్‌పై ది బాస్‌ అని రాసి ఉంది. బ్యాట్‌పై ఉన్న స్టిక్కర్‌ ద్వారా గేల్‌ ఒక మెసేజ్‌ను పాస్‌ చేశాడు. 'అందరికి ఒక విషయం చెప్పాలనుకుంటున్నా.. నేను చూపించే ఈ పేరుకు కొంచెం గౌరవం ఇవ్వండి' అంటూ పేర్కొన్నాడు.