రష్యాకు చెందిన ఓ కంపెనీ వినూత్న ఆఫర్‌ను ప్రకటించింది. అదీకూడా కంపెనీలో పనిచేసే మహిళా ఉద్యోగులకు మాత్రమే. మేకప్ చేసుకుని స్కర్టులు ధరించి వచ్చిన వారికి మాత్రమే బోనస్ ఇస్తామని సెలవిచ్చింది. ఈ విషయం సోషల్ మీడియాలో వైరల్ కావడంతో నెటిజన్లు దుమ్మెత్తి పోస్తున్నారు.
తాజాగా వెలుగులోకి వచ్చిన ఈ వివరాలను పరిశీలిస్తే, రష్యాకు చెందిన టాటా ప్రూఫ్ అనే అల్యూమినియం తయారీ కంపెనీ 2014లో రష్యాలో నిర్వహించిన వింటర్ ఒలింపిక్స్ పోటీల్లో వివిధ రకాల అల్యూమినియం ఉపకరణాలను తయారుచేసి సరఫరా చేసింది.
అయితే, ఈ కంపెనీ తాజాగా మహిళా ఉద్యోగుల కోసం ఫెమినిటీ మారథాన్ అనే ప్రత్యేక కార్యక్రమాన్ని నిర్వహించనుంది. ఈ ఈవెంట్ నెల రోజుల పాటు జరుగనుంది. ఈ కార్యక్రమంలో పాల్గొనే మహిళలు మోకాళ్ళపైకి స్కర్టులు ధరించి, ఫుల్‌మేకప్‌తో వస్తే రోజుకు 100 రుబుళ్లు (భారత కరెన్సీలో రూ.107) బోనస్ ఇస్తామంటూ ప్రకటన చేసింది.
అయితే, ఈ ఆఫర్‌ను అంగీకరించేందుకు మహిళా ఉద్యోగులు తమ ఫోటోలను ఓ ప్రత్యేక ఫోన్ నంబరుకు పంపాల్సి ఉంటుంది. ఈ విషయం సోషల్ మీడియాలో లీకై వైరల్ అయింది. దీంతో రష్యాలోని మహిళా సంఘాలతో పాటు నెటిజన్లు తీవ్రంగా వ్యతిరేకిస్తూ కంపెనీ చర్యలను ఖండిస్తున్నారు. స్కర్టులు, మేకప్‌లు వేసుకోవాల్సింది మహిళలు కాదనీ కంపెనీ యాజమాన్యమే వేసుకోవాలని నెటిజన్లు కామెంట్స్ చేస్తున్నారు.