కలియుగ ఋషి : ఘన పదార్థాలు బంద్... ఓన్లీ బీర్ అండ్ వాటర్

సాధారణంగా ఋషులు ఆహారపానీయాలు మానేస్తారనే విషయాన్ని పురాణాల్లోనే వింటూ ఉంటాం. కానీ ఓ వ్యక్తి ఆహారం పూర్తిగా బంద్ చేసేసి... కేవలం బీర్, నీళ్లు మాత్రమే పుచ్చుకోవడం చేసే ఒక పెద్ద మనిషిని ప్రస్తుతం ఫ్లోరిడాలో చూడవచ్చు. అయితే ఈ పెద్ద మనిషి చేసిన పని సోషల్ మీడియాలో ఇప్పుడు వైరల్‌గా మారింది. 

ఈ వివరాలను పరిశీలిస్తే, ఓహియోకు చెందిన డెల్‌హల్ అనే సదరు వ్యక్తి ఆర్మీ అధికారిగా పనిచేసారు. రిటైర్ అయిన తర్వాత ప్రజల్లో ప్రత్యేకంగా గుర్తింపు పొందాలని ఆశించారు. అయితే అందుకోసం ఏం చేయాలో అతడికి తెలియకపోవడంతో... ఓ రోజు ఎటువంటి ఘనపదార్థాలు తీసుకోకుండా కేవలం బీర్, నీళ్లు మాత్రమే తాగాడు. అలా నాలుగు రోజులు బీర్లు, నీళ్లు మాత్రమే అతడి ఆహారంగా మారింది. 

అలా నాలుగు రోజులు కాస్త 46 రోజులు అయ్యాయి. అన్ని రోజులు గడిచినా కూడా డెల్ కేవలం బీర్, నీళ్లు మాత్రమే తాగి బతుకేస్తున్నాడు. సోషల్ మీడియాలో డెల్ చేసే పని గురించి పోస్ట్ పెట్టాడు. చాలా మంది నెటిజన్లకు డెల్ చేస్తున్న పని పట్ల ఆసక్తి కలిగింది. కొంతమంది డెల్‌ను నమ్మని వ్యక్తులు అతడి వద్దకు వచ్చి మరీ వివరాలు అడిగి తెలుసుకున్నారు. డెల్ కేవలం బీర్, నీళ్లు మాత్రమే తాగుతున్నాడని వాళ్లు నిర్ధారించుకున్నారు కూడా. 

పుర్రెకో బుద్ధి అంటే ఇదేనేమో మరి...