ప్రపంచ దేశాల్లో ఉత్తర కొరియా విచిత్ర దేశంగా ఉంది. దీనికి కారణం ఆదేశాధినేత కిమ్ జాంగ్ ఉన్. ఆయన ఓ నియంతలా వ్యవహరిస్తున్నారు. కరోనా సమయంలో వైరస్ సోకిన ప్రతి ఒక్కరినీ చంపేసినట్టు వార్తలు వచ్చాయి. అలాగే, ఆయన తీసుకునే నిర్ణయాలు, పరిపాలనా విధానం పిచ్చి తుగ్లక్‌ను తలపిస్తుందనే ఆరోపణలు లేకపోలేదు.
తాజాగా ఆయన తీసుకున్న మరో నిర్ణయం చర్చనీయాంశంగా మారింది. హాలీవుడ్ చిత్రాలు వీక్షించే వారికి కఠిన శిక్షలు విధిస్తామంటూ హెచ్చరించారు. గతంలో పొరుగున ఉన్న దక్షిణ కొరియా సినిమాలు, టీవీ షోలు చూస్తే ఉత్తర కొరియాలో మరణ శిక్షలు కూడా విధిస్తారు. ఇపుడు దీన్ని హాలీవుడ్ చిత్రాలకు కూడా వర్తింపజేశారు.
తమ పిల్లలను హాలీవుడ్ చిత్రాలు వీక్షించేందుకు అనుమతినిచ్చే తల్లిదండ్రులకు ఈ శిక్షలను అమలు చేయనున్నారు. పిల్లలు పాశ్చాత్య దేశాల సినిమాలు, టీవీ కంటెంట్ చూస్తూ దొరికిపోతే వారి తల్లిదండ్రులు లేబర్ క్యాంపులకు పంపుతామని హెచ్చరించారు.
పెద్దలు ఆర్నెల్ల పాటు లేబర్ క్యాంపులో ఉండాలని, పిల్లలకు ఐదేళ్ళ జైలు శిక్ష విధిస్తామని తెలిపింది. పిల్లలకు చదువు తప్ప మరో ధ్యాస ఉండరాదని లేకపోతే వారు పెట్టుబడిదారీ వ్యవస్థలో భాగమైపోతారని కిమ్ ప్రభుత్వం గత కొంతకాలంగా ప్రచారం చేస్తుంది.