సాధారణంగా రైళ్లు, బస్సుల్లో దొంగతనంగా ప్రయాణించవచ్చు. ముఖ్యంగా, రైళ్ళలో అయితే, బాత్రూమ్‌లు సీట్ల కింద దాక్కొని ప్రయాణం చేయొచ్చు. కానీ, విమానాల్లో మాత్రం అలా సాధ్యపడదు. కానీ, ఓ ప్రయాణికుడు మాత్రం ఎయిర్‌పోర్టు అధికారుల కళ్లుగప్పి.. ఏకంగా 1640 కిలోమీటర్ల మేరకు ప్రయాణించాడు. ఈ విమానం ల్యాండింగ్ అయిన తర్వాత ఆ వ్యక్తి బయటకు వచ్చిన తీరు చూసి ఎయిర్‌పోర్టు గ్రౌండ్ సిబ్బంది ఒక్కసారి అవాక్కయ్యారు.
తాజాగా వెలుగులోకి వచ్చిన ఈ వివరాలను పరిశీలిస్తే, గ్యాటెమాల సిటీ నుంచి మియామీకి ఒక విమానం బయలుదేరింది. ఈ విమానం ల్యాండింగ్ గేర్ బాక్స్ లోపల కూర్చొని ఏకంగా 1,640 కిలోమీటర్ల దూరంపాటు నాలుగైదు గంటలు కూర్చొని ప్రయాణం చేశాడు.
ఆ విమానం మియామీలో ల్యాండ్ అయిన తర్వాత ఆ ప్రయాణికుడు బయటకు రాగా, గ్రౌండ్ సిబ్బంది గుర్తించి అదుపులోకి తీసుకున్నారు. దీనికి సంబంధించిన వీడియో ఒకటి ఇపుడు సోషల్ మీడియాలో చక్కర్లు కొడుతోంది. అయితే, అలా ప్రయాణించిన ప్రయాణికుడి వివరాలు వెల్లడికాలేదు. అతని వద్ద ఎయిర్ పోర్టు అధికారులు విచారణ జరుపుతున్నారు.