సిరియాలో అమెరికా దాడి.. ఐసిస్ అగ్రనేత అబూబకర్ బాగ్దాదీ హతం?

సిరియాలో ఉగ్ర సంస్థ ఐసిస్ లక్ష్యంగా చేసుకుని అమెరికా దాడి జరిపింది. ఈదాడిలో ఐసీసీ అగ్రనేత అబూ బకర్ బాగ్దాదీతో పాటు.. మొత్తం 9 మంది ఐసిస్ నేతలు హతమైనట్టు వార్తలు వస్తున్నాయి. 

ఈ నేపథ్యంలో సిరియా దాడిపై అమెరికా అధ్యక్షుడు డోనాల్డ్ ట్రంప్ ఓ ట్వీట్ చేశారు. సిరియాలో 'భారీ సంఘటన జరిగింది' అంటూ అమెరికా అధ్యక్షుడు డొనాల్డ్ ట్రంప్ కూడా ట్వీట్ చేయడంతో ఈ విషయం చర్చనీయాశమైంది. 

ఐసిస్ స్థావరాలపై అమెరికా చేసిన దాడిపై బిట్రన్ కు చెందిన ఓ మానవ హక్కుల సంస్థ పలు వివరాలు తెలిపింది. సిరియా వాయవ్య ప్రాంతంలోని ఇడ్లిబ్ ప్రావిన్స్లో ఉన్న బారిషా గ్రామంలో హెలికాప్టర్ నుంచి సైనికులు జరిపిన కాల్పుల్లో తొమ్మిది మంది మృతి చెందారని పేర్కొంది. 

ఆ ప్రాంతంలో ఇస్లామిక్ స్టేట్‌కు చెందిన ఉగ్రవాదులు ఉంటారని వివరించింది. బారిషా శివారు ప్రాంతంలో ఉన్న ఓ ఇల్లు, కారుపై సైనికులు ఈ దాడి చేశారని పేర్కొంది. 

అయితే, అమెరికా చేపట్టిన ప్రత్యేక ఆపరేషన్‌లో ఇదే ప్రాంతంలో ఐసిస్ అగ్రనేత అబూ బకర్ అల్ బాగ్దాదీని అమెరికా సైన్యం హతమార్చిందని కథనాలు వస్తున్నాయి. దీనిపై అమెరికా అధికారిక ప్రకటన చేయలేదు.