ఇటీవల ఇరాన్ రాజదాని టెహ్రాన్ సమీపంలో ఉక్రెయిన్ దేశానికి చెందిన బోయింగ్ విమానం కుప్పకూలిపోయింది. ఈ ప్రమాదంలో ఏకంగా 176 మంది వరకు ప్రాణాలు కోల్పోయారు. ఈ విమానం టెహ్రాన్ ఎయిర్‌పోర్టు నుంచి టేకాఫ్ అయిన కొద్దిసేపటికే కూలిపోయింది. సాంకేతిక లోపం వల్ల కూలిపోయివుండొచ్చని భావించారు.
నిజానికి ఇరాన్ - అమెరికా దేశాల మధ్య దాడులు, ప్రతిదాడులు జరుగుతున్నాయి. దీంతో ఈ విమాన ప్రమాదంపై ప్రపంచ వ్యాప్తంగా చర్చ జరిగింది. అయితే, ఈ విమానం కూలిపోవడానికి గల వీడియోలు విడుదలయ్యారు. ఇరాన్ సైన్యం భూతల మార్గం నుంచి ప్రయోగించిన క్షిపణుల కారణంగా ఈ విమానం కూలిపోయినట్టు తేలింది.
ఈ నిజాన్ని ఇరాన్ అంగీకరించింది. విమానాన్ని తామే కూల్చేశామంటూ ఇరాన్ ఎట్టకేలకు ఒప్పుకుంది. ఇరాన్ విదేశాంగ మంత్రి జవద్ జరీఫ్ ట్విట్టర్ ద్వారా స్పందిస్తూ, ఉద్దేశపూర్వకంగా ఈ చర్యకు పాల్పడలేదని తెలిపారు. కేవలం మానవ తప్పిదంగానే దీన్ని పరిగణించాలని కోరారు. అమెరికా దుందుడుకు చర్యలే ఈ ఘటనకు దారి తీశాయని ఆరోపించారు. మృతుల కుటుంబసభ్యులకు, తమ పౌరులను కోల్పోయిన దేశాలకు క్షమాపణలు చెబుతున్నామని అన్నారు.
విమానం కూలిపోయిన తర్వాత... ఇరానే ఈ చర్యకు పాల్పడిందనే ఆరోపణలు వచ్చాయి. అయితే, ఈ ఆరోపణలను ఇరాన్ ఖండించింది. కానీ, ఇరానే విమానాన్ని కూల్చిందంటూ అమెరికా, కెనడా ఇంటెలిజెన్స్ విభాగాలు వీడియోల రూపంలో వెల్లడించాయి. దీనికితోడు, విమానాన్ని ఓ అగ్నిగోళం వంటి వస్తువు తాకిన ఓ వీడియో కూడా బహిర్గతమైంది. ఈ నేపథ్యంతో, చివరకు ఇరాన్ నిజాన్ని అంగీకరించకతప్పలేదు.